Galw am gefnogaeth i ddatblygu stadiwm Cae Ras Wrecsam

Mae cyn-sêr Cymru wedi lansio ymgyrch i ddatblygu stadiwm Clwb Pêl-Droed Wrecsam.

Mae Malcolm Allen a Mickey Thomas yn galw am gefnogaeth i sicrhau cyllid i ailddatblygu'r Cae Ras fel bod "chwaraeon rhyngwladol yn gallu dychwelyd i ogledd Cymru".

Y nod yw datblygu eisteddle i ddal 5,500 o gefnogwyr, cael gwell cyfleusterau ar gyfer y cyfryngau, maes parcio aml-lawr i 400 o geir a gwaith tir ar gyfer canolfan gynadledda a gwesty.

Mae'r ymgyrch yn rhan o gais Cyngor Wrecsam i gronfa Codi'r Gwastad Llywodraeth y DU. Bydd y penderfyniad ariannu yn digwydd yn haf 2022.

Fis Chwefror, fe gyhoeddodd perchnogion Clwb Pêl-Droed Wrecsam, y sêr Hollywood Ryan Reynolds a Rob McElhenney, eu bod yn y broses o brynu tir y Cae Ras.

Dywedodd y ddau ar y pryd y byddai cael bod yn berchen ar y stadiwm yn eu rhoi "â rheolaeth dros ein tynged ein hunain".

Fe brynodd Rob McElhenney and Ryan Reynolds y clwb yn Chwefror 2021

Bydd Cyngor Wrecsam nawr yn gwneud y cais am gyllid i ailddatblygu'r stadiwm dan yr enw 'Porth Wrecsam'.

Mae'r cais yn cynnwys cymysgedd o gyllid cyhoeddus a phreifat er mwyn cyrraedd y nod.

Annheg i gefnogwyr y gogledd

Dywedodd Mickey Thomas, bod angen denu pobl ifanc a chwaraeon rhyngwladol yn ôl i'r gogledd ac mae angen yr arian er mwyn gwneud hynny.

Mae cost ac anhawster gorfod teithio i Gaerdydd yn rhwystr i lawer o bobl yn y gogledd, medd Mickey Thomas

"Mae'r cyllid yn hanfodol os am wireddu uchelgais gogledd Cymru o gael cyfleusterau yn y Cae Ras ar gyfer chwaraeon rhyngwladol," dywedodd.

"Ar hyn o bryd does dim cyfleusterau yn y gogledd sy'n gallu cynnal chwaraeon rhyngwladol [pêl-droed a rygbi] ac felly o reidrwydd mae'n rhaid chwarae'r gemau i gyd mewn ardal i'r de o'r M4 yng Nghymru.

"Oherwydd y diffyg cyfleusterau yma mae llawer o bobl ifanc a theuluoedd ar hyd a lled y Gogledd yn cael eu cau allan o'r digwyddiadau hyn i bob pwrpas oherwydd y gost a'r anhawster o gyrraedd Caerdydd ar ddiwrnod gêm, a go brin fod hynny'n deg."

Mae'r Cae Ras - ynghyd â Thraphont Pontcysyllte - ymysg atyniadau mwyaf adnabyddus ardal Wrecsam

Mae Wrecsam wedi cyrraedd rhestr fer Dinas Diwylliant y DU 2025 ac mae'r clwb pêl-droed yn rhan allweddol o boblogrwydd diweddar y dref.

Yn ôl cyn-chwaraewr Cymru, Malcolm Allen, dylai pêl-droed rhyngwladol "ddychwelyd i lle ddechreuodd" yn Wrecsam.

Dywedodd hefyd y byddai ailddatblygu'r stadiwm yn hwb i bobl ifanc ymuno mewn campau chwaraeon.

Malcom Allen yw un o'r cyn-chwaraewyr sy'n galw am sicrhau cyllid i ailddatblygu stadiwm y Cae Ras yn Wrecsam

"Mae pawb yn gwybod am y manteision iechyd hirdymor sy'n gallu deillio o ysbrydoli pobl ifanc i gymryd rhan mewn chwaraeon, ac mae cael mynediad i gemau rhyngwladol yn gallu chwarae rhan bwysig o ran denu cyfranogiad," dywedodd.

"Mae angen i ni ddangos i'r rhai sy'n gwneud penderfyniadau pa mor bwysig ydi hyn i bobl Cymru, a dod â phêl-droed rhyngwladol yn ôl i'r lle y dechreuodd, yn Wrecsam."

Bydd yr ymgyrch yn rhedeg tan ganol Mehefin ac mae pobl ar draws Cymru yn cael eu hannog i lofnodi cofrestr gefnogaeth.