'Rheolwyr Cymru'n haeddu’r un clod â'r chwaraewyr'

Page yw'r 'Gaffer' erbyn hyn medd, Wayne Hennessey

Does dim dwywaith fod llwyddiant tîm pêl-droed Cymru dros y blynyddoedd diwethaf wedi bod yn y tu hwnt i ddisgwyliadau'r mwyafrif o'u cefnogwyr - gan gyrraedd rownd gynderfynol Euro 2016 ac yna rownd yr 16 olaf yn 2020.

Nawr, fe allai'r tîm gyrraedd rowndiau terfynol Cwpan y Byd am y tro cyntaf ers 1958.

Chwaraewr sydd wedi bod yn un o gonglfeini'r llwyddiant diweddar yw'r golgeidwad Wayne Hennessey.

Fe fydd chwaraewr 35 oed yn aros i glywed ddydd Iau pwy yn union fydd yn y garfan i wynebu'r Alban neu Wcráin yng Nghaerdydd ar ddydd Sul 5 Mehefin.

Bydd y rheolwr Robert Page hefyd yn cynnwys chwaraewyr yn y garfan ar gyfer gemau Cymru yng nghystadleuaeth Cynghrair y Cenhedloedd yn erbyn Yr Iseldiroedd, Gwlad Belg a Gwlad Pwyl.

Y cyn-reolwr John Toshack oedd y cyntaf i ddewis Hennessey i gynrychioli Cymru

Roedd Hennessey yng ngharfannau Cymru yn Ewro 2016 ac Ewro 2020 - ac yn y gôl i Gymru wrth iddyn nhw guro Awstria fis Mawrth i sicrhau lle yn rownd derfynol gemau ail gyfle Cwpan y Byd Qatar 2022.

Gyda Chymru ar drothwy sicrhau lle yng Nghwpan y Byd am y tro cyntaf ers 1958 mae Hennessey yn dweud fod y rheolwyr rhyngwladol dros y 15 mlynedd ddiwethaf yn haeddu'r un clod ac mae'r chwaraewyr wedi'i dderbyn.

John Toshack oedd y cyntaf i ddewis Hennessey i Gymru, ac enillodd ei gap cyntaf yn erbyn Seland Newydd yn 2007.

Mae pedwar rheolwr arall wedi ei ddewis ers hynny, gan gynnwys y rheolwr diweddaraf Robert Page.

• Gêm dyngedfennol Cymru i'w chynnal ar 5 Mehefin

• Cwpan y Byd: Cymru i wynebu Lloegr, Iran ac UDA?

Yn ôl Hennessey, mae Page wedi sefydlu ei hun yn y rôl ers 2020 ar ôl iddo gael ei benodi wedi i Ryan Giggs sefyll o'r neilltu tra'n aros am achos llys ar gyhuddiad o achosi niwed corfforol.

Erbyn hyn mae'r garfan yn cyfeirio at Page fel y 'Gaffer', meddai.

Fe wnaeth Robert Page gymryd yr awenau gan Ryan Giggs yn Nhachwedd 2020

"Dwi'n teimlo'n ffodus a dweud y gwir," meddai Hennessey tra'n siarad â BBC Cymru yng nghanolfan ymarfer ei glwb Burnley.

"Rydyn ni fel gwlad wedi cael chwaraewyr a rheolwr gwych.

"Gary Speed oedd y sylfaen, ac wedi ein gosod ni ar y trywydd iawn a symud ymlaen - bendith i'w enaid.

"Wedyn yn amlwg fe ddaeth Chris Coleman a gwneud gwaith gwych ond dal i gadw pethau'r un fath, a pharhau i symud i'r cyfeiriad cywir, ac yna Ryan yn dod i mewn a rŵan Pagey.

"Mae popeth wedi aros yr un fath, sy'n hanfodol i'r chwaraewyr, ac fel 'da chi'n gallu gweld mae'r perfformiadau wedi dilyn ar y cae.

"Mae gan y chwaraewyr berthynas agos, a dechreuodd hynny gyda Gary Speed."

Roedd Danny Ward (chwith) wedi sefydlu ei hun fel dewis cyntaf Cymru cyn iddo gael ei anafu

Collodd Hennessey ei le fel dewis cyntaf Cymru yn y gôl yn dilyn anaf yn erbyn Bwlgaria ym mis Hydref 2020 gyda golwr Caerlŷr, Danny Ward, rhwng y pyst ar gyfer Euro 2020 a'r rhan fwyaf o'r ymgyrch i gyrraedd Qatar 2022.

Ond mae Hennessey yn parhau yn un o hoelion wyth y garfan, ac wedi chwarae ei ran yn erbyn Awstria ym mis Mawrth ar ôl i Ward gael llawdriniaeth ar ei ben-glin.

"Mae bod yn golwr yn gallu bod yn anodd - dim ond un lle sydd ar gael yn y tîm," meddai Hennessey.

"Mae Danny wedi dod i mewn i'r tîm ac wedi chwarae yn dda iawn.

"Roedd yr anaf yn anffodus iawn i Dan. Mae o'n foi hyfryd.

"Mae o'n holliach rŵan, felly mae yna ddigon o gystadleuaeth yn y garfan am le yn y tîm."

Cyflwynwyd Wayne Hennessey gyda thlws gan Neville Southall ar achlysur ei 100fed cap

Pan fydd Page yn cyhoeddi ei garfan ar gyfer gemau Cymru fis nesa' yng Nghynghrair y Cenhedloedd a'r gêm ail gyfle yn erbyn un ai Wcráin neu'r Alban, bydd enw Hennessey ar y rhestr.

"Byddai'n gwbl wych [i gyrraedd Cwpan y Byd)], nid yn unig i ni fel grŵp o chwaraewyr ond hefyd i'r genedl gyfan sydd wedi bod yn ein cefnogi," meddai.

Mae Hennessey yn rhan o oes aur pêl-droed Cymru, ac efallai mai dyma'r cyfle olaf i nifer gyrraedd Cwpan y Byd.

"I fi yn bersonol byddai'r profiad yn anhygoel - ac i fy nheulu.

"Ond wedyn dwi'n edrych ar chwaraewyr fel [Gareth] Bale, [Aaron] Ramsey, [Chris] Gunter ac [Joe] Allen… maen nhw'n dal i chwarae ac wedi bod yn wych i Gymru a dwi'n gobeithio gall hynny barhau, a'u bod nhw'n cyrraedd Cwpan y Byd.

"Iddyn nhw gyrraedd Cwpan y Byd, dwi'n siŵr y bydd eu teuluoedd yn falch ofnadwy."