Nifer fwyaf erioed o ymwelwyr ag Eisteddfod yr Urdd

Mae mwy o ymwelwyr nag erioed o'r blaen - 118,000 - wedi ymweld ag Eisteddfod yr Urdd eleni, medd y trefnwyr ar ddiwrnod olaf Eisteddfod Sir Ddinbych 2022.

Roedd yna fynediad am ddim i'r ŵyl eleni ar gyrion Dinbych - Eisteddfod lawn gyntaf yr Urdd ers cyn y pandemig - wedi i Lywodraeth Cymru roi £527,000 i gefnogi'r mudiad ieuenctid wrthi iddo ddathlu ei ganmlwyddiant.

Mae'r nifer ymwelwyr yn torri'r record a sefydlwyd y tro diwethaf i'r Eisteddfod gael ei chynnal heb godi tâl mynediad i'r Maes - ym Mae Caerdydd yn 2019.

Bydd yna drafodaethau nawr wrth i'r golygon droi at baratoi ar gyfer Eisteddfod y flwyddyn nesaf yn Llanymddyfri.

• Urdd: Trefn tri llwyfan a dim rhagbrofion i barhau

• Gŵyl Triban: Edrych ymlaen at 'barti go iawn'

• Eisteddfod yr Urdd 2022: 'Da ni yma o'r diwedd!'

Mae Eisteddfod eleni wedi denu 118,000 o ymwelwyr, medd y trefnwyr

Dywedodd Prif Weithredwr yr Urdd, Siân Lewis, bod y mudiad nawr yn gallu edrych tua'r dyfodol gyda hyder yn dilyn heriau'r pandemig ar ddiwedd "wythnos hynod lwyddiannus".

"Mae e wedi bod yn 'Steddfod i bawb, mae o wedi bod yn llwyfan i bawb," meddai. "'Dan ni wedi gweld gymaint o wynebe newydd yn cyrraedd y maes ac yn mwynhau'r diwylliant Cymreig ar ei ora' fan hyn wythnos yma."

Mae'r Urdd "mewn lle cadarn heddiw", meddai, ac yn "symud at y dyfodol yn bositif. "Mi oedd 'na heriau yn ystod Covid... ond 'dan ni wedi troi'r gornel".

"Gollon ni weithlu [ond] mae gweithlu'r Urdd erbyn heddiw'n ôl bron i lle oedd o cyn Covid a trosiant yr Urdd yn sicr yn symud i'r cyfeiriad iawn."

Mae Gŵyl Triban ymhlith llu o newidiadau i'r arlwy wrth gynnal yr Eisteddfod lawn gyntaf ers 2019

Mae'r newidiadau i drefniadau'r Eisteddfod eleni, gan cynnwys tri phafiliwn a dim rhagbrofion, "wedi gweithio ar y Maes eleni [a] bydden ni'n asesu a gwerthuso rheina wrth symud ymlaen".

Ychwanegodd eu bod "yn sicr yn awyddus i barhau i esblygu'r Eisteddfod er mwyn bo ni'n gallu cynnig yr Eisteddfod i bawb".

'Mae 'di bod yn 'Steddfod wefreiddiol'

Bu'n rhaid gohirio Eisteddfod eleni ddwywaith oherwydd y pandemig.

"Mae'n anodd disgrifio sut mae rhywun yn teimlo," dywedodd cadeirydd y pwyllgor gwaith, Dyfan Phillips ddydd Sadwrn.

"Mae' di bod yn wythnos anhygoel. Ma' rhywun yn paratoi gym'int ac yn edrych ymlaen ond mae 'di bod yn 'Steddfod wefreiddiol wsos yma."