Peter Ormerod wedi marw o 'anaf trawmatig i'w ben'

Roedd Peter Ormerod wedi torri ei benglog mewn sawl man a dioddef cleisiau ar yr ymennydd

Mae cwest wedi clywed y bu farw cyn-athro yn Sir Gâr fis Medi o ganlyniad i "anaf trawmatig i'w ben".

Fe wnaeth Peter Ormerod, 75, ddioddef anafiadau difrifol mewn ymosodiad honedig ym Mhorth Tywyn ar 24 Medi.

Bu farw'r cyn-athro Mathemateg yn Ysgol Gyfun Gymraeg Bro Myrddin o'i anafiadau yn Ysbyty Athrofaol Cymru yng Nghaerdydd bedwar diwrnod yn ddiweddarach.

Cafodd y cwest i'w farwolaeth ei agor a'i ohirio yn Llanelli ddydd Gwener.

'Sawl toriad i'w benglog'

Yn ystod y gwrandawiad darllenwyd adroddiad heddlu oedd yn dweud fod Mr Ormerod wedi "dioddef anaf trawmatig i'w ben" yn y digwyddiad.

Dywedodd y dirprwy grwner Mark Layton fod y patholegydd Dr Richard Jones wedi nodi fod asesiadau cychwynnol yn awgrymu i Mr Ormerod farw o "anaf i'w ben oedd yn cynnwys sawl toriad i'w benglog a chleisiau ar yr ymennydd".

Yn gynharach yr wythnos hon fe wnaeth Hywel David Williams, 39 oed o ardal Grangetown yng Nghaerdydd, ymddangos yn Llys y Goron Abertawe wedi'i gyhuddo o ddynladdiad Mr Ormerod.

Mae'n gwadu'r cyhuddiad a chafodd ei ryddhau ar fechnïaeth tan ddechrau'r achos yn ei erbyn ym mis Gorffennaf 2023.

Cafodd y cwest ei ohirio nes y bydd unrhyw achos cyfreithiol yn dod i ben.