Sut i wneud y mwyaf o fwyd dros ben y Nadolig?

Pei twrci a hamKristina Banholzer

Pei twrci a ham

Rhwng y twrci, yr ham, a'r pwdinau diddiwedd mae 'na fwyd dros ben yn siŵr o fod o gwmpas eich tŷ chi wedi'r gwledda mawr ar ddiwrnod y Nadolig.

Yr awdur a chogydd Rhian Cadwaladr sy'n rhannu ei chyngor ar sut i ddefnyddio sbarion y Nadolig yma gan rannu ryseitiau arbennig o'i llyfr Casa 'Dolig fydd yn cael ei ryddhau yn 2023.

line

Wedi cael llond bol ar frechdanau twrci ond mae 'na domen o gig ar ôl? Does wiw gwastraffu, yn enwedig a'r deryn wedi costio cymaint! Dyma i chi syniadau sy'n defnyddio twrci dros ben mewn prydau blasus. Cadwch mewn cof mai dim ond unwaith y medrwch ail dwymo cig yn saff.

Cyri Twrci a Saws Llugaeron

Cyri twrci a llugaeronKristina Banholzer

Cyri twrci a llugaeron

Mae'r rysait yma yn defnyddio cynhwysion sydd yn aml ar gael mewn cwpwrdd bwyd ond mae'n hawdd ei addasu at eich dant - defnyddiwch tsili, sunsur ffres, a sbeisus gwahanol.

Cynhwysion:

  • 1 nionyn wedi ei falu'n fân

  • llwyaid o olew

  • 3 clôf garlleg

  • llond llwy fwrdd o bowdwr cyri mwyn

  • tun o domatos wedi eu torri'n ddarnau

  • dyrnaid o swltanas

  • llond llwy fwrdd o saws llugaeron (cranberry)

  • Twrci wedi ei dorri'n ddarnau

Dull:

  • Coginiwch y nionyn yn yr olew mewn padell neu sosban ar wres cymhedrol nes ei fod yn hollol feddal

  • Ychwanegwch y garlleg a choginwich ymhellach am gwpwl o funudau

  • Ychwanegwch y powdwr cyri a'i droi yn dda i'r nionod. Coginiwch am gwpwl o funudau

  • Tywalltwch y tun tomatos i fewn i'r badell

  • Ychwanegwch y saws llugaeron, y swltanas a'r twrci

  • Coginiwch am oddeutu 15 munud nes fod y twrci wedi coginio drwyddo

  • Ychwanegwch halen a phupur at eich dant

Salad Satay Twrci

Salad satay twrciKristina Banholzer

Salad satay twrci

Cynhwysion:

  • Twrci wedi ei goginio a'i dorri'n stribedi ddim rhy fawr

  • 1 llwy fwrdd cnau menyn (peanut butter)

  • 1/2 llwy fwrdd saws tsili melys (sweet chilli sauce)

  • sudd 1/2 leim

  • 1 llwy fwrdd saws soy

  • 60ml llaeth coconyt

  • dyrnaid o ddail coriander fresh wedi eu malu'n fân

  • dail letys gem neu iceberg

Dull:

  • Cymysgwch bopeth heblaw y twrci mewn powlen fawr

  • Ychwanegwch y twrci a cymysgu'n dda

  • Dewiswch ddail letys o tua'r un maint i fod yn gwpanau i ddal y twrci

  • Rhannwch y twrci rhwng y dail

Pei Twrci a Ham

Pei twrci a hamKristina Banholzer

Pei twrci a ham

Mae'r bei yma yn rhywbeth y byddwn ni'n gael yn tŷ ni bob 'Dolig. Does dim yn neisiach efo platiad o chips ar ôl bod am dro hir. Gallwch ei rhewi at eto (cyn ei choginio) os mynnwch.

Cynhwysion:

  • 1 pecyn toes flaky pastry wedi rholio'n barod

  • 30g o fenyn

  • 1 llond llwy fwrdd o flawd plaen

  • 1 coesyn cennin bach wedi ei lanhau a'i sleisio'n ddarnau

  • 400 - 500ml grêfi dros ben (neu stoc cyw iâr neu gymysgedd)

  • 150ml hufen (sengl, dwbwl, crème fraîche - beth bynnag sydd ganddoch dros ben)

  • dyrnaid dda o dwrci wedi ei goginio a'i dorri'n ddarnau

  • dyrnaid dda o ham wedi ei goginio a'i dorri'n ddarnau

  • halen a phupur

  • 1 ŵy wedi ei guro

  • Dyrnaid o barsli ffresh wedi malu'n fân

Dull:

  • Rhowch y popdy ymlaen ar 200c /180c ffan/ nwy 6

  • Irwch ddysgl bei - gorau oll os oes ganddoch chi un yr un siap a maint a'ch toes

  • Toddwch y menyn mewn sosban fawr a coginiwch y cennin ynddo dros wres isel dan gaead, nes ei fod yn feddal

  • Ychwanegwch y blawd a cymysgwch yn dda

  • Ychwanegwch y grefi (neu y stoc) yn raddol gan droi yr holl amser nes fod ganddoch chi saws eithaf trwchus

  • Coginiwch am gwpwl o funudau cyn ychwanegu yr hufen (os nad oes ganddoch chi hufen mae'n ddigon blasus hebddo, neu gallwch ychwanegu llefrith)

  • Blaswch ac ychwanegwch halen a phupur os oes angen

  • Coginiwch ar wres isel am rhyw funud arall

  • Tynnwch y sosban oddi ar y tân ac ychwanegwch y darnau o dwrci a'r ham

  • Rhowch y cyfan yn y ddysgl

  • Dad rholiwch y toes a rhowch o ar ben y gymysgedd (mi fydd rhaid rholio ychydig os ydi siap eich dysgl yn wahanol)

  • Torrwch dri hollt bach ar dop y bei er mwyn i stêm fedru dianc drwyddo

  • Peintiwch yr ŵy dros y bei a rhowch y ddysgl ar hambwrdd pobi rhag ofn i'r saws ferwi drosodd

  • Coginiwch am oddeutu 30 - 40 munud nes fod y bei wedi crasu a'r cig wedi coginio drwyddo

Syllabub

SyllabubKristina Banholzer

Syllabub

Dyma i chi bwdin Seisnig hynafol sy'n ffordd dda o ddefnyddio unrhyw win a hufen sydd ganddoch dros ben. Does dim ond tri o gynhwysion ac mae'n arbennig o hawdd. Digon i bedwar bach neu ddau fawr.

Cynhwysion:

  • 100ml gwin gwyn melys

  • 50g siwgwr mân

  • 1 lemon

  • 300ml hufen dwbwl

Dull:

  • Rhowch y gwin mewn sosban fach efo'r siwgwr a stribedi tenau o groen y lemon (y croen yn unig a ddim y pith sydd oddi tano)

  • Cynheswch ar wres isel nes fod y siwgwr wedi toddi

  • Gadewch o am o leia awr i'r blas gryfhau

  • Tynwch y croen lemon allan a rhoi'r gwin mewn powlen fawr

  • Tywalltwch yr hufen i fewn i'r fowlen a chwisgiwch gan fod yn ofalus rhag gor chwipio. Dylai syllabub fod yn ysgafn

  • Rhannwch rhwng gwydrau bychan

Pwdin Bara Panettone

Pwdin bara panettoneKristina Banholzer

Pwdin bara panettone

Os oes ganddoch chi hanner banettone wedi dechrau sychu peidiwch a'i thaflu - defnyddiwch hi i wneud y pwdin cynhesol yma.

Cynhwysion:

  • 4 tafell dew o banettone (8 os yw'n banettone fach)

  • menyn

  • 350ml llefrith

  • 50ml hufen dwbwl

  • 2 ŵy

  • 20g siwgwr gwyn

  • Croen un oren wedi gratio

  • 1 llwy fawr siwgwr coch (demerara)

Dull:

  • Rhowch y popdy ymlaen ar rif 180c/160c ffan/ nwy 4

  • Irwch ddysgl efo menyn

  • Rhowch haenen o fenyn dros pob tafell o banettone a torrwch yn drionglau

  • Rhowch nhw yn y ddysgl a thaenu y croen oren drostynt

  • Cyneswch y llefrith a'r hufen mewn sosban ond peidiwch a'i ferwi

  • Curwch y ŵyau efo'r siwgwr gwyn mewn powlen neu jwg mawr

  • Cymysgwch y llefrith a'r hufen efo'r ŵyau a'r siwgwr

  • Tywalltwch y cymysgedd, drwy ridyll (sieve) dros y panettone

  • Tasgwch y siwgwr coch dros y cwbwl

  • Pobwch am 30-40 munud nes fod y bara a'r siwgwr wedi crasu

Hefyd o ddiddordeb: