Cefnogwyr Wrecsam yn ysu am barti ar y Cae Ras

Roedd cefnogwyr yn heidio yn eu miloedd i'r Cae Ras yn barod am gêm fawr

Mae hi wedi bod yn ddegawd a hanner cythryblus i dîm pêl-droed Wrecsam.

Ond erbyn hyn mae tîm y Cae Ras o fewn cyrraedd eu breuddwyd o ddychwelyd i gynghrair bêl-droed Lloegr.

Sylwebydd pêl-droed Radio Cymru, Dylan Griffiths, sy'n bwrw golwg nôl dros y daith llawn cyffro - taith sydd erbyn hyn yn denu sylw rhyngwladol.

Byddai buddugoliaeth yn ddigon i sicrhau dyrchafiad i'r Dreigiau.

Fe fydd Dylan a chyn-chwaraewr Wrecsam a Chymru Wayne Phillips yn sylwebu ar y gêm rhwng Wrecsam a Boreham Wood ar raglen Chwaraeon Radio Cymru am 18:15 ddydd Sadwrn.

Bydd Dylan Griffiths a Wayne Phillips yn sylwebu yn fyw ar y gêm ddydd Sadwrn

Mae cefnogwyr Wrecsam wedi aros yn hir am y diwrnod yma - pymtheg mlynedd i ddweud y gwir.

Roeddwn i yn Henffordd pan gollodd y Dreigiau o ddwy gôl i ddim yn erbyn y tîm cartref - canlyniad oedd yn golygu eu bod yn syrthio o'r Gynghrair Bêl-Droed am y tro cyntaf mewn 87 o flynyddoedd.

Ers y cyfnod hwnnw, mae 'na gymaint wedi digwydd - pryder gwirioneddol y byddai'r clwb yn mynd i'r wal, yna yn mynd i ddwylo'r gweinyddwyr am 18 mis, colli yn erbyn Casnewydd yn rownd derfynol gemau ail gyfle 2013 yn Wembley a nifer o reolwyr yn mynd a dod.

• Llwyddiannau CPD Wrecsam yn hwb i dwristiaeth y ddinas

• Wrecsam: Cynllun cyllido i ailddatblygu'r Cae Ras

Ond mi ddaeth tro ar fyd yn y modd mwyaf dramatig posib pan y cyhoeddwyd ym mis Chwefror 2021 bod dau o sêr Hollywood, Ryan Reynolds a Rob McElhenney, wedi prynu clwb y Cae Ras ac ers y diwrnod hwnnw mae'r diddordeb a'r sylw mae'r clwb wedi ei dderbyn wedi bod yn rhyfeddol.

Mae llwyddiant y Dreigiau wedi trawsnewid ar ôl dyfodiad y perchnogion newydd Rob McElhenney a Ryan Reynolds

Yn wythnosol mae 'na gamerâu teledu yn dilyn hynt a helynt y clwb.

Mae'r gyfres ddogfen 'Welcome to Wrexham' wedi rhoi'r ddinas ar y map rhyngwladol gyda chefnogwyr o'r Unol Daleithau, Canada a thu hwnt yn ymwelwyr cyson bellach yng ngogledd Cymru.

Ond tydi cael perchnogion enwog a digon o bres ddim o hyd yn gwarantu llwyddiant, fel y cafodd ei brofi y tymor diwethaf.

Er gorffen yn ail yn y tabl, colli oedd hanes Wrecsam yn erbyn Grimsby yn rownd gyn derfynol y gemau ail-gyfle.

Phil Parkinson: 'Byddai sicrhau dyrchafiad o flaen cefnogwyr y tîm cartref yn beth arbennig'

Yn naturiol felly roedd 'na bwysau cynyddol ar y rheolwr Phil Parkinson y tymor yma i lwyddo.

Gyda dwy gêm o'r tymor i fynd maen nhw wedi cael 107 o bwyntiau sy'n record, wedi sgorio 112 o goliau a heb golli ar y Cae Ras yn y gynghrair.

Mewn unrhyw dymor arferol mi fyddai Wrecsam wedi sicrhau dyrchafiad ers amser bellach, ond mae'r frwydr gyda Notts County sy'n ail wedi bod yn un debyg i'r un rhwng Arsenal a Manchester City yn Uwch Gynghrair Lloegr .

Ben Foster a chwaraewyr Wrecsam yn dathlu wedi'r fuddugolaeth yn erbyn Notts County

Mae County ar 103 o bwyntiau, ond roedd y fuddugoliaeth 3-2 yn eu herbyn ar Ddydd Llun Y Pasg yn ganlyniad anferth sy'n golygu bod tynged Wrecsam yn eu dwylo nhw eu hunain.

Mi ddywedodd Parkinson wrtha i'r wythnos yma y byddai sicrhau dyrchafiad o flaen cefnogwyr y tîm cartref yn beth arbennig i'w wneud.

"Byddai'n golygu gymaint oherwydd yr hyn mae'r clwb wedi bod drwy a'r boen o 15 mlynedd yn yr adran hon.

"Ry' ni'n gwybod beth mae'n ei olygu ac yn benderfynol o roi popeth sydd gennym ar y penwythnos," meddai.

Mae'r clwb wedi bod trwy gyfnodau tywyll ond erbyn hyn yn obeithiol am y dyfodol

Mi fydd yna dros 10,000 yn bresennol eto heno, ac i'r cefnogwyr sydd wedi bod yn selog dros y blynyddoedd diwethaf a'r cefnogwyr newydd sydd wedi eu hudo gyda'r cynnwrf diweddar, mae heno gobeithio am fod yn noson i'w thrysori a chymaint wrth gwrs wedyn i edrych ymlaen ato ar gyfer y tymor nesaf, ond un cam ar y tro...