Anghydfod prifathrawon yn dod i ben wedi cynnig newydd

Bydd undeb prifathrawon yn dod ag anghydfod dros gyflogau i ben wedi iddyn nhw dderbyn cynnig newydd.

Mewn pleidlais a gafodd ei chynnal yn ystod hanner tymor, fe wnaeth 74% dderbyn y cynnig newydd.

Mae'r cynnig yn cynnwys cyflog gwell am ddwy flynedd yn ogystal ag addewid o gytundeb llwyth gwaith ac adolygiad cyllid.

Roedd y cynnig cyflog yn gynnydd o 6.5% ar gyfer 2022/23 yn ogystal â thaliad untro 1.5% a chynnydd o 5% ar gyfer 2023/24.

Mae aelodau o Undeb NAHT yng Nghymru wedi bod mewn anghydfod swyddogol ers mis Chwefror, ond bydd y gweithredu yn dod i ben ddydd Gwener.

Ysgolion mewn sefyllfa 'amhosib'

Dywedodd Cyfarwyddwr NAHT Cymru, Laura Doel, bod y camau sydd wedi'u cymryd gan brifathrawon eleni wedi "diogelu'r ddarpariaeth addysg yn fwriadol, ond wedi amlygu heriau sy'n wynebu ysgolion a oedd wedi mynd yn rhy hir heb i neb sylwi arnynt".

Ychwanegodd fod diffyg ariannu ysgolion yn eu rhoi mewn "sefyllfaoedd amhosib lle'r oedd yn rhaid iddyn nhw ddiswyddo staff er mwyn arbed arian".

• Undeb prifathrawon yn gwrthod cynnig cyflog newydd

Dywedodd ysgrifennydd cyffredinol NAHT, Paul Whiteman na ddylai fod angen protestio "er mwyn cael cytundeb sy'n dderbyniol i'r aelodau ac er budd plant a phobl ifanc yng Nghymru".

"Mae'r cyllid ychwanegol sydd wedi ei sicrhau trwy weithredu yn gymorth mawr i ysgolion."

Dywedodd bod y cytundeb llwyth gwaith hefyd yn hanfodol er mwyn "rhyddhau athrawon a phenaethiaid i ganolbwyntio ar yr hyn sydd wirioneddol yn bwysig sef addysg o'r radd flaenaf i bawb".

Fe dderbyniodd athrawon o undeb NEU gynnig am gyflog gwell ym mis Mawrth yn dilyn streicio.