Canran y graddau Safon Uwch gorau yn debyg iawn i'r llynedd

Daeth Viktoriia Tkackenko, 20, i Gymru o Wcráin ar ôl dechrau'r rhyfel â Rwsia - mae hi ar ei ffordd i Brifysgol Abertawe i astudio Hanes a Gwleidyddiaeth

Mae cyfran y graddau Safon Uwch uchaf yng Nghymru wedi aros yn debyg iawn i'r llynedd.

Roedd 10.5% o'r graddau yn A* - ychydig yn uwch na'r llynedd - tra bod 29.5% yn A* ac A o'i gymharu â 29.9% yn 2024.

Mae mesurau ychwanegol i gefnogi myfyrwyr ar ôl y pandemig wedi cael eu gollwng yn raddol fel rhan o'r bwriad i ddychwelyd i drefniadau 'normal'.

Roedd yna newidiadau i arholiadau yn 2022 a 2023 er mwyn adlewyrchu'r effaith gafodd Covid-19 ar ddysgu.

Yn ymateb i'r canlyniadau fore Iau, dywedodd y Gweinidog Addysg Lynne Neagle y byddai'n "parhau i weithio ar godi safonau addysgol a sicrhau bod gan bob person ifanc y gefnogaeth sydd ei hangen arnynt i gyflawni eu nodau".

Roedd y canlyniadau yn cael eu rhannu gyda myfyrwyr am 08:00, ond mae'r trefniadau yn gallu amrywio rhwng ysgolion a cholegau.

Bydd canlyniadau y Fagloriaeth Sgiliau Cymru Uwch a rhai cymwysterau galwedigethol gan gynnwys BTEC yn cael eu cyhoeddi hefyd.

Dadansoddiad: 'Dim newid mawr'

Nid yw canlyniadau Lefel A - neu Safon Uwch - cyffredinol Cymru yn dangos y newidiadau mawr o flwyddyn i flwyddyn yr ydym wedi bod yn gyfarwydd â nhw ers 2020. Maen nhw, fwy neu lai, yn unol â 2024.

Mae'r dychweliad i drefniadau arholiadau 'normal' wedi bod yn fwy graddol nag yn Lloegr, gyda bron pob un o'r mesurau cymorth ychwanegol i fyfyrwyr wedi'u gollwng y llynedd.

Ond roedd rhai ffiniau gradd yn dal i fod yn isel iawn yn 2024.

Mewn rhai pynciau maen nhw'n debygol o fod yn uwch eleni wrth i berfformiad - gobeithio - wella ar ôl holl aflonyddwch blynyddoedd Covid.

Mae'r efeilliaid, Adrian a Łukasz Kolman, yn mynd i astudio electroneg a pheirianneg electroneg

Astudiodd yr efeilliaid Adrian a Łukasz, 18, o Gasnewydd, yr un pynciau ar gyfer eu Safon Uwch ac maen nhw wedi cael cynnig i astudio yr un cwrs - ond mewn prifysgolion gwahanol.

Cafodd Lukasz 1A* a 2A a chafodd Adrian 2A* ac 1A ond maen nhw'n dweud nad oes "unrhyw gystadleuaeth" a'u bod wedi helpu ei gilydd i astudio.

Dywedodd Lukasz: "Rwyf mor gyffrous ac yn hapus i fynd i'r brifysgol rwyf ei heisiau."

Dywedodd Adrian ei fod "mor hapus" i gael ei ddewis cyntaf a'i fod yn credu y byddan nhw'n cael "amser eu bywydau" yn y brifysgol.

Mae'r brodyr wedi derbyn cynnig i astudio ym mhrifysgolion Bryste a Chaerfaddon er mwyn astudio electroneg a pheirianneg electroneg.

'Canlyniadau yn debyg i'r rhai cyn Covid'

Yn 2020 a 2021 cafodd arholiadau eu gohirio a chafodd y graddau eu gosod gan athrawon.

Yn 2022 ac eto yn 2023, fe dderbyniodd myfyrwyr wybodaeth ynglŷn a chynnwys eu papurau arholiadau o flaen llaw.

Daeth y cymorth ychwanegol i ben yn 2024, ond fe benderfynodd Cymwysterau Cymru barhau gyda "rhwyd ddiogelwch" rhag ofn bod perfformiad myfyrwyr mewn rhai pynciau yn cwympo'n is na'r hyn oedd i weld cyn y pandemig.

Eleni, nid oes "rhwyd ddiogelwch" a mae'n debygol y bydd ffiniau graddau mewn rhai pynciau yn uwch.

Dywedodd y corff sy'n gwarchod safonau cymwysterau yng Nghymru y "dylai'r canlyniadau ar y cyfan fod yn debyg i'r canlyniadau a welwyd cyn y pandemig yn y rhan fwyaf o bynciau".

Bod yn ymwybodol o'r holl opsiynau sy'n agored i chi yw'r cam cyntaf yn ôl y cynghorydd gyrfa, Catrin Owen

Mae'r nifer fwyaf erioed o fyfyrwyr 18 oed yn debygol o fynd i'r brifysgol o'u dewis cyntaf eleni, hyd yn oed os ydyn nhw'n derbyn canlyniadau sydd ychydig yn is na'r hyn sy'n ofynnol, yn ôl pennaeth UCAS.

Dywedodd Dr Jo Saxton bod prifysgolion eisiau cofrestru myfyrwyr o'r Deyrnas Unedig oherwydd yr "ansicrwydd" ynghylch niferoedd myfyrwyr o dramor.

Mae'r broses glirio hefyd yn opsiwn i bobl ifanc na sy'n llwyddo i gael y graddau sydd eu hangen neu i'r rhai sy'n newid eu meddwl ynglŷn a pha bynciau maen nhw eisiau astudio yn y brifysgol.

Yn ôl ffigyrau diweddaraf UCAS, 32.5% o bobl ifanc 18 oed o Gymru oedd wedi gwneud cais i'r brifysgol erbyn diwedd mis Mehefin, o gymharu â 41.2% ar draws y Deyrnas Unedig.

Mae Beau wedi dysgu nifer o sgiliau weldio yn ystod ei brentisiaeth gyda chwmni peirianneg

I'r bobl ifanc sydd yn ansicr ynglŷn â beth i wneud nesaf ar ôl derbyn eu canlyniadau, mae cyngor ar gael gan Gyrfa Cymru.

"Mae pawb yn wahanol a mae gan bawb opsiynau gwahanol sy'n siwtio nhw orau," meddai'r cynghorydd gyrfa, Catrin Owen.

"Mae'r brifysgol dal yn opsiwn a weithiau yr opsiwn gorau i bobl ifanc ond rydyn ni yn gweld mwy o opsiynau ar gael fel prentisiaethau neu efallai bo chi eisiau mynd yn syth i'r gwaith.

"I wybod am yr holl opsiynau, dewch i siarad gyda chynghorydd gyrfa a fedrwn i edrych ar bob dim hefo chi.

"Dydych chi ddim ar eich pen eich hun."

Fe gychwynnodd Beau Tattersall, 19, ei brentisiaeth gyda chwmni peirianneg ar Lannau Dyfrdwy "heb unrhyw brofiad o gwbl".

"'Nes i ddwy flynedd yn y coleg yn Sir Benfro ond fe wnes i benderfynnu fy mod i eisiau ennill arian tra'n dysgu ar yr un pryd felly dyna pam wnes i ddewis prentisiaeth," meddai.

Dywedodd prentis arall, Laurence Coleman, 20, ei fod wedi cael ychydig o brofiadau "heriol" yn ystod ei yrfa byr hyd yma, ond ei fod yn mwynhau ei brofiad fel prentis.

"Dim dyma oedd fy opsiwn cyntaf ar ôl gadael yr ysgol, ond yn y pen draw fe benderfynais i wneud cais i'r coleg. Mae'n rhaid bod yn agored i gyfleoedd gwahanol," ychwanegodd.