Tom Lockyer yn cwrdd â meddygon achubodd ei fywyd ar gae pêl-droed

Stopiodd calon Tom Lockyer am dros ddau funud cyn i barafeddygon ei adfywio

Mae'r pêl-droediwr Tom Lockyer wedi cwrdd â'r staff meddygol a wnaeth achub ei fywyd pan gafodd ataliad ar y galon ar y cae chwarae yn 2023.

Roedd yr amddiffynnwr 30 oed yn gapten ar Luton Town mewn gêm Uwch Gynghrair yn Bournemouth pan ddisgynnodd ar y cae.

Stopiodd ei galon am ddau funud a 41 eiliad cyn i barafeddygon lwyddo i'w adfywio.

Wrth gyfarfod â'r parafeddygon, Dean Fernee ac Abbey Clarke, yn Stadiwm Vitality Bournemouth, dywedodd Lockyer eu bod nhw'n "arwyr" y noson honno.

Cafodd Lockyer ataliad ar y galon ar y cae ar 16 Rhagfyr 2023

Un o'r bobl gyntaf i drin Lockyer ar y noson oedd ffisiotherapydd Luton, Chris Phillips.

Roedd Phillips hefyd ar ddyletswydd yn Wembley rai misoedd ynghynt pan lewygodd Lockyer yn ystod ffeinal gemau ail gyfle'r Bencampwriaeth.

Roedd yn deall difrifoldeb y sefyllfa yn syth.

Roedd meddygon Bournemouth hefyd wedi amau mai problem gyda'r galon oedd y digwyddiad, gan fod meddygon Luton wedi trafod pryderon am chwaraewyr gyda nhw - rhywbeth nad oedd Lockyer yn ymwybodol ohono.

Roedd Tom Lockyer yn gapten ar Luton Town yn y gêm pan gafodd yr ataliad

Mae Lockyer, sydd ag 16 cap i Gymru, yn cofio deffro ar ôl i'r diffibriliwr gael ei ddefnyddio a chlywed pobl yn siarad - ond nid oedd yn gallu ymateb.

Dywedodd nad oedd yn gallu symud: "Doeddwn i ddim yn gallu siarad. Roeddwn i'n meddwl, 'dwi'n iawn', ond doedd dim byd yn dod allan."

Mae'n cofio ei fod eisiau rhoi arwydd i'r dorf - oedd yn cynnwys ei dad a'i bartner beichiog - ei fod yn iawn.

Mae Dean Fernee, un o'r parafeddygon, yn cofio pa mor dawel oedd yr 11,000 o gefnogwyr.

"Doedd y dorf ddim yn sylweddoli nes i ni dy gario di i ffwrdd. Dyna pryd y tarodd fod pawb yno," meddai Mr Fernee wrth Lockyer.

Ychwanegodd Abbey Clarke, parafeddyg arall, bod rhywun yn "dal arni ac yn rhoi eich pen i lawr - ac yn y pen draw, Tom oedd o'n blaenau ni".

"Mae dal yn glaf ac mae'n rhaid i ni anwybyddu pawb arall o'n cwmpas a rhoi'r gofal oedd ei angen arno," meddai.

Cafodd Lockyer ei eni yng Nghaerdydd ac mae bellach â diffibriliwr bach wedi'i fewnblannu yn ei frest, rhag ofn iddo gael ataliad arall ar y galon.

Nid yw wedi medru dod yn ôl i chwarae eto, fe wnaeth anafu ei ffêr wythnos cyn yr oedd disgwyl iddo ddychwelyd am y tro cyntaf ers yr ataliad.

Dywedodd wrth y BBC bod ei fywyd wedi newid ers y digwyddiad.

"Roedd yn eithaf anodd yn feddyliol, oherwydd am 20 mlynedd roeddwn i wedi bod yn 'Tom Lockyer y pêl-droediwr' ac fe gafodd hynny ei gymryd gen i, dros nos.

"Doeddwn i ddim yn gwybod beth i'w wneud â fy hun, pwy oeddwn i mewn gwirionedd, roedd yn dipyn o argyfwng i fy hunaniaeth."

Mae Lockyer bellach yn llysgennad i'r British Heart Foundation, ac mae'n angerddol am hyrwyddo hyfforddiant adfywio, gan ddweud ei bod yn cymryd 15 munud i ymweld â gwefan yr elusen a dysgu beth i'w wneud.

Ychwanegodd Lockyer y "gallwch chi fod yn arwr i rywun yr ydych chi'n ei garu a pheidiwch â gadael i 15 munud o'ch amser atal hynny rhag digwydd".

"Gallwch chi achub bywyd rhywun yn llythrennol ac mae'n debyg mai rhywun rydych chi'n ei nabod ac yn ei garu fydd o."

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.