£107m i gwmni Cymreig ddatblygu triniaethau ar gyfer iselder

Fe allai'r cyffuriau fydd yn cael eu datblygu gan Draig Therapeutics gael eu defnyddio ymhen pum mlynedd

Mae cwmni gwyddonol o Brifysgol Caerdydd wedi cael buddsoddiad gwerth £107m i ddatblygu therapïau "trawsnewidiol" ar gyfer anhwylderau gan gynnwys iselder difrifol.

Dyma'r buddsoddiad masnachol mwyaf mewn ymchwil yng Nghymru erioed.

Yn ôl yr Athro Simon Ward, o Sefydliad Darganfod Meddyginiaethau Prifysgol Caerdydd, gallai'r cyffuriau gael eu defnyddio ymhen pum mlynedd, gan ddod ag "arian sylweddol" yn ôl i'r brifysgol.

"Ma' gwneud y treialau hyn yn gostus tu hwnt," meddai.

"Ma' angen arian sylweddol i ddatblygu triniaethau arbennig ar gyfer pob math o gyflyrau gan gynnwys iselder a phryder."

Dywedodd yr Athro Simon Ward y byddai'n "hoff iawn o weld mwy o bwyslais ar beth sy'n bosib ar lefel wyddonol yng Nghymru"

Aeth yr Athro Ward ymlaen i esbonio'r broses: "Ni angen darganfod a yw'r cyffur yn mynd i fod yn saff, ond hefyd a yw'n mynd i fod yn effeithiol."

Ychwanegodd: "Ma'r meddyginiaethau a'r opsiynau sydd ar gael ar hyn o bryd yn eithaf hen, ac er eu bod nhw'n help mawr i lot o bobl ma' nifer yn dal ddim yn cael yr help ma' nhw angen, yn enwedig gydag iselder."

Dywedodd y gallai hyn fod yn help mawr o ystyried cyflwr economaidd y brifysgol ar hyn o bryd, oherwydd "yn y pendraw os ydy'r cwmni'n llwyddo, bydd arian sylweddol yn dod yn ôl i brifysgol Caerdydd".

'Mwy o hyder yng ngwyddoniaeth Cymru'

Ymchwil o Gymru sydd wrth galon cwmni Draig Therapeutics, ond yn ôl yr Athro Ward mae angen cael mwy o hyder yng ngallu gwyddonol y wlad.

"Ni'n ymfalchïo yn y ffaith ein bod ni o Gaerdydd. Mae'n le priodol oherwydd yr arbenigedd yn y maes a dyle ni fod yn falch o hynny.

"Wrth godi'r arian yn America, Asia ac Ewrop roedd 'na lawer o ddiddordeb am wreiddiau'r cwmni, a neb yn cwestiynu 'pam Cymru?'"

Aeth ymlaen i ddweud mai "un o'r pethau sydd fwyaf rhwystredig i fi yw'r diffyg hunan hyder sydd gennym ni yng Nghymru, ac nad yw pobl yn medru gweld be' sy'n bosib yng Nghymru".

Y buddsoddiad hwn fydd y buddsoddiad masnachol mwyaf mewn ymchwil yng Nghymru erioed

Yn rhan o'r buddsoddiad, bydd tri chyffur sydd â'r potensial i fod gyda'r gorau o ran trin anhwylderau niwroseiciatrig yn cael eu datblygu mewn treialon clinigol.

"Rwy' moyn cyfrannu at hyder pobl yma i gario 'mlaen â'u syniadau, bod pobl sy'n astudio gwyddoniaeth yma yn gweld y cyfleoedd a'r arian sy' ar gael, a'r arian sydd yn bosib cyflawni syniadau a'r potensial sydd gennym ni," meddai'r Athro Ward.

"Fyswn i'n hoff iawn o weld mwy o bwyslais ar beth sy'n bosib ar lefel wyddonol yng Nghymru, a gweld y potensial o be' sy'n bosib.

"Dyw e ddim yn rhan annatod o beth y ni'n trafod yn ein cymunedau Cymraeg yng Nghymru. Byddai'n hyfryd gweld twf o ddiddordeb yn y maes."

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.