Llys yn clywed i gar 'siglo' cyn gwrthdrawiad angheuol

Mae Abubakr Ben Yusaf (chwith) a'i frawd Umar Ben Yusaf yn gwadu'r cyhuddiadau yn eu herbyn

Mae un o ddau frawd sydd wedi'u cyhuddo o achosi marwolaeth tad i ddau drwy yrru'n beryglus, wedi dweud wrth lys bod ei gar wedi dechrau "siglo" ac wedi mynd allan o reolaeth cyn y gwrthdrawiad.

Cafodd Rhys Jenkins o Ddeuddwr ym Mhowys ei ladd ar yr A483 ger y Trallwng ar 16 Tachwedd y llynedd.

Fe gafodd ei fab, Ioan, ei anafu'n ddifrifol hefyd pan darodd BMW X3, a oedd yn cael ei yrru gan Abubakr Ben Yusaf, yn syth i flaen y car.

Mae Mr Ben Yusaf, 30, a'i frawd Umar Ben Yusaf, 34, yn gwadu achosi marwolaeth drwy yrru'n beryglus ac yn gwadu achosi anaf difrifol drwy yrru'n beryglus.

Bu farw Rhys Jenkins yn dilyn gwrthdrawiad ger Y Trallwng fis Tachwedd

Mae Abubakr Ben Yusaf a'i frawd yn gweithio fel optometryddion locwm ac wrth roi tystiolaeth yn ei amddiffyniad yn Llys y Goron yr Wyddgrug dywedodd Mr Ben Yusaf eu bod yn gyrru adref i Fanceinion o Aberystwyth mewn ceir ar wahân.

Ychwanegodd nad oedd yn ymwybodol bod ei frawd wedi bod yn gyrru y tu ôl iddo.

Dywedodd wrth y llys ei fod wedi goddiweddyd ceir eraill ar y daith, ond bob amser "mewn modd diogel" a'i fod wedi bod yn gyrru o fewn y terfyn cyflymder.

Dywedodd fod y car wedi dechrau "lithro" eiliadau cyn y ddamwain pan oedd yn gyrru heb unrhyw geir o'i flaen nac y tu ôl iddo ac nad oedd yn gallu adennill rheolaeth ar y car.

"Dydw i ddim yn gwybod pam ddigwyddodd hynny," meddai, "a'r canlyniad oedd y drasiedi sydd wedi digwydd".

"Fe lithrodd [y car] draw i ochr arall y ffordd, a digwyddodd y peth gwaethaf posibl" ychwanegodd.

Dywedodd ei fod "mewn cyflwr o sioc a phanig" ar ôl y ddamwain.

Esboniodd ei fod wedi gorfod dod allan o ochr y teithiwr gan nad oedd yn gallu agor drws y gyrrwr. Cerddodd i ffwrdd rhag ofn i'r car fynd ar dân.

"Mae fy nghof yn eithaf aneglur," meddai, ond dywedodd ei fod wedi gweld car ei frawd a mynd i mewn, cyn colli ymwybyddiaeth.

"Roeddwn i'n meddwl fy mod i ar fin marw," meddai.

Wrth gael ei groesholi gofynnodd bargyfreithiwr yr erlyniad John Philpotts i Mr Ben Yusaf pa un ohonyn nhw awgrymodd gadael y lleoliad ar ôl y ddamwain?

Atebodd ei fod ef, Abubakr, am "fynd i'r ysbyty".

Gofynnwyd iddo pam nad oedd wedi aros am ambiwlans ac fe ddywedodd ei fod "yn ofni am ei fywyd" a "doeddwn i ddim yn meddwl yn glir".

Cwestiynodd y bargyfreithiwr hefyd a oedd yn iawn nad oedd yn gwybod bod ei frawd yn gyrru y tu ôl iddo?

"Ni fyddai unrhyw ffordd i mi wybod," meddai, "roeddwn i'n canolbwyntio ar y ffordd."

Dywedodd Mr Ben Yusaf hefyd wrth y llys y byddai'n "anghytuno" â thystion a oedd wedi rhoi tystiolaeth yn dweud ei fod yn gyrru'n rhy gyflym ac yn beryglus.

Ychwanegodd fod "wir ddrwg ganddo" a'i fod yn "edifar" am yr hyn a ddigwyddodd.

"Allai ddim dychmygu beth mae'r teulu'n mynd trwyddo" meddai.

Un o'r diffynyddion - Umar Ben Yusaf - yn gadael y llys ddydd Gwener

Yn gynharach yn yr achos fe nododd y barnwr y dylai'r rheithgor gael Umar Ben Yusaf yn ddieuog o un o'r cyhuddiadau mae'n ei wynebu.

Dywedodd y Barnwr Simon Mills nad oedd yna ddigon o dystiolaeth yn gysylltiedig â'r cyhuddiad yn erbyn Umar Ben Yusaf o achosi marwolaeth tra'n gyrru heb yswiriant.

Mae Abubakr Ben Yusaf yn dal i wynebu'r un cyhuddiad.

Mae'r achos yn parhau.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.