Jac Morgan ddim am chwarae yng Nghymru os yw'r Gweilch yn diflannu

Fe symudodd Morgan i'r Gweilch o'r Scarlets yn 2021

Mae Jac Morgan wedi dweud wrth Undeb Rygbi Cymru (URC) na fyddai'n aros i chwarae yng Nghymru os yw'r Gweilch yn diflannu.

Mewn cyfarfod gyda chefnogwyr yr wythnos hon, dywedodd prif weithredwr y Gweilch fod capten Cymru wedi rhoi rhybudd clir i'r undeb - sy'n ystyried cynlluniau i haneru nifer y timau proffesiynol ar hyn o bryd.

Morgan - un o'r unig ddau Gymro i gael eu cynnwys yng ngharfan y Llewod dros yr haf - yw'r chwaraewr presennol amlycaf i leisio'i anfodlonrwydd â'r cynlluniau.

Mae cytundeb y blaenasgellwr 25 oed gyda'r Gweilch yn dod i ben ar ddiwedd tymor 2025-26.

Mae URC yn dweud mai torri nifer y clybiau rygbi proffesiynol o bedwar i ddau ydy'r "cam radical" sydd ei angen i achub y gêm yng Nghymru.

Ond mae'r corff yn ystyried modelau ariannu eraill hefyd, wrth iddyn nhw gynnal cyfnod ymgynghori a ddaw i ben ar ddiwedd y mis.

Mae Cymdeithas Chwaraewyr Rygbi Cymru (CCRC) wedi dweud wrth yr undeb bod eu cynigion ar gyfer y gêm elitaidd yn mynd i "yrru talent o Gymru".

Mae disgwyl penderfyniad terfynol ar ddyfodol y rhanbarthau proffesiynol erbyn diwedd mis Hydref.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.