Mwy o rybuddion i ddod wrth i wyntoedd Éowyn ostegu

Coeden wedi disgyn ar y ffordd rhwng Capel Dewi a Llangynnwr

Mae rhybudd bod mwy o dywydd garw i ddod yng Nghymru dros y penwythnos, wrth i wyntoedd Storm Éowyn ostegu.

Yn hwyr brynhawn Sadwrn dywedodd SP Energy Networks eu bod yn parhau i geisio adfer y cyflenwad trydan i oddeutu 500 o gwsmeriaid.

Mae'r Swyddfa Dywydd wedi cyhoeddi rhybudd melyn am rew ar gyfer de, canolbarth a rhannau o orllewin Cymru ddydd Sadwrn, a dydd Sul mae rhybudd melyn am wyntoedd cryfion a glaw ar gyfer Cymru gyfan.

Yr olygfa ym Mhorthcawl ddydd Gwener

Pa rybuddion sydd i ddod?

Mae'r Swyddfa Dywydd yn rhybuddio, hyd yn oed wedi i Storm Éowyn basio, y bydd y tywydd ansefydlog yn parhau am rai dyddiau eto.

Fe ddaeth rhybudd am rew i rym am 03:00 ddydd Sadwrn a daeth hwnnw i ben am 10:00.

Dydd Sul, mae disgwyl gwyntoedd cryfion o 08:00 tan 15:00 dros Gymru gyfan.

Mae 'na rybudd melyn am law trwm mewn grym hefyd o 08:00 fore Sul tan 06:00 fore Llun, ar gyfer pob sir oni bai am Ynys Môn.

Mae rhybuddion am wynt a glaw mewn grym ddydd Sul

Roedd pob ysgol ar Ynys Môn ar gau ddydd Gwener, gyda degau o ysgolion yng Ngwynedd hefyd ar gau i ddisgyblion.

Yn Sir Ddinbych, roedd Ysgol Tir Morfa, Ysgol Carrog, Ysgol Gatholig Crist y Gair ac Ysgol Uwchradd Y Rhyl ar gau.

Dywedodd yr ysgolion bod yna drefniadau gwahanol "er mwyn lleihau'r tarfu ar ddysgu" gan gynnwys adnoddau ar-lein a phecynnau gwaith pwrpasol.

• Edrych yn ôl ar effeithiau Storm Éowyn ar ein llif byw

Siroedd Môn, Gwynedd, Conwy, Dinbych a'r Fflint a gafodd eu taro waethaf, yn ôl y Swyddfa Dywydd, gyda miloedd o bobl heb drydan.

Cafodd hyrddiad 93.3mya ei gofnodi yn Aberdaron rhwng 06:00 a 07:00.

Roedd rhybudd oren am wynt mewn grym ar draws y gogledd tan 21:00 ddydd Gwener

Cafodd teithiau fferi Stena Line o Gaergybi i Ddulyn rhwng 22:30 nos Iau a 13:45 prynhawn Gwener eu canslo.

Fe wnaeth Trafnidiaeth Cymru a Network Rail annog "yn gryf" i'r cyhoedd wirio cyn teithio ar drên neu fws ddydd Gwener a dechrau'r penwythnos, gan rybuddio pobl i "ddisgwyl tarfu".

Roedd Network Rail wedi gohirio gwasanaethau i'r gorllewin o Abertawe ar ôl i goeden ddisgyn ar y lein, ond mae'r broblem honno bellach wedi ei datrys.

Fe wnaeth Trafnidiaeth Cymru hefyd ohirio'r gwasanaeth rhwng Canol Wrecsam a Bidston.

Mae Pont Britannia bellach wedi ailagor ond mae cyfyngiadau cyflymder ar gyfer carafanau, beiciau a beiciau modur.

Roedd hi'n anodd sefyll yn llonydd ym Mae Trearddur fore Gwener oherwydd y gwyntoedd cryfion, yn ôl un o ohebwyr BBC Cymru

Fe allai newidiadau i wasanaethau mewn ymateb i'r tywydd garw arwain at deithiau hirach na'r arfer i rai.

Bysiau oedd yn cludo teithwyr ar drenau Llinell Dyffryn Conwy a lein Calon Cymru ddydd Gwener, tra bod cyfyngiadau cyflymder o 50mya i drenau mewn sawl ardal hefyd.

Dywedodd y cwmnïau y bydd "bysiau wrth gefn mewn lleoliadau allweddol o amgylch y rhwydwaith os bydd tarfu ychwanegol".

Mae Network Rail wedi trefnu timau ymateb "i fynd i'r afael ag unrhyw broblemau sy'n gysylltiedig â stormydd er mwyn achosi cyn lleied o darfu â phosibl".

Er yr holl gynllunio, maen nhw'n rhybuddio "y gall stormydd fod yn anodd eu rhagweld o hyd" ac yn ymddiheuro am unrhyw anghyfleustra.

Dywedodd Cyfarwyddwr Gweithrediadau Trafnidiaeth Cymru, Sarah Higgins fod difrod i drenau a'r seilwaith yn sgil stormydd garw "weithiau'n cymryd wythnosau neu fisoedd i'w atgyweirio" a'r gobaith yw "cyfyngu ar hynny" a chadw gweithwyr a theithwyr "yn ddiogel".

"Yn anffodus, fe fydd rhywfaint o oedi a chanslo ddydd Gwener," meddai Cyfarwyddwr Gweithrediadau Network Rail Cymru a'r Gororau, Rachel Heath

Ychwanegodd fod yna gydweithio agos gyda chwmnïau trên eraill er mwyn ailagor llinellau'n ddiogel cyn gynted â phosib.

Mae 'na drafferthion ar y ffyrdd mewn sawl rhan o'r wlad yn sgil coed sydd wedi disgyn

Roedd canolfannau ymwelwyr Cyfoeth Naturiol Cymru ynghau ddydd Gwener, ac roedd pobl yn cael eu hannog i "osgoi teithio i'n coedwigoedd a'n gwarchodfeydd".

"Mae'r gwyntoedd cryfion a ddisgwylir gyda Storm Éowyn, wedi'i waethygu gan y difrod a achoswyd eisoes gan Storm Darragh, yn cynyddu'n sylweddol y perygl o goed a changhennau yn cwympo yn yr ardaloedd hyn," meddai llefarydd.

Roedd canolfannau ymwelwyr yng Nghoed y Brenin, Bwlch Nant yr Arian, ac Ynyslas, yn ogystal â Gwarchodfa Natur Genedlaethol a Choedwig Niwbwrch ynghau ddydd Gwener.

Mae'r RNLI hefyd wedi annog unrhyw un sy'n ymweld â'r arfordir dros y dyddiau nesaf i sicrhau eu bod yn cadw eu pellter o'r môr.