Undeb Rygbi Cymru yn cymryd rheolaeth ar Rygbi Caerdydd

Mae Rygbi Caerdydd yn chwarae ym Mharc yr Arfau, sydd yng nghysgod Stadiwm Principality

Mae Undeb Rygbi Cymru (URC) wedi cymryd rheolaeth ar Rygbi Caerdydd ar ôl i endid cyfreithiol y clwb gael ei roi yn nwylo'r gweinyddwyr.

Roedd disgwyl y datblygiad yma ar ôl i'r tîm rhanbarthol ddweud ddydd Mawrth am eu bwriad i benodi gweinyddwr.

Dogfen ffurfiol ydy hon sy'n cael ei chyflwyno mewn llys gan gwmni neu gyfarwyddwyr i ddweud wrth bartïon bod y cwmni'n bwriadu mynd i ddwylo'r gweinyddwyr - proses sydd â'r nod o helpu busnes i osgoi mynd i'r wal yn llwyr.

Yn fuan wedi i gyfarwyddwyr y clwb benodi PwC, fe wnaeth y gweinyddwr werthu busnes y clwb a'i asedau i URC.

Dywedodd URC mai Caerdydd yw'r mwyaf o'r pedwar clwb proffesiynol yng Nghymru, a'u bod yn sicr y bydd rygbi proffesiynol yn parhau yn y brifddinas.

Ychwanegodd URC na fydd chwaraewyr a staff Caerdydd yn cael eu heffeithio gan y gwerthiant ac y bydd y gemau'n cael eu cyflawni, gyda thocynnau tymor a gemau yn parhau'n ddilys.

Mewn datganiad ddydd Mercher, cadarnhaodd Rygbi Caerdydd bod "hysbysiad o fwriad i benodi gweinyddwyr wedi'i ffeilio".

"Gallwn eich sicrhau ein bod yn gwneud popeth o fewn ein gallu i amddiffyn ein gweithwyr a dyfodol y clwb.

"Mae gennym ni gynllun yn ei le a byddwn yn eich diweddaru cyn gynted â phosib."

Mewn datganiad ddydd Mercher, dywedodd PwC bod Helford Capital wedi methu â rhoi'r arian parod i'r clwb, a dyna wnaeth eu gwthio i ddwylo'r gweinyddwyr.

"Tra bod y cyfranddalwyr wedi cyfrannu rhywfaint, maen nhw wedi bod yn sylweddol is na'r symiau gafodd eu cytuno arnynt yn y cytundeb, ac o ganlyniad mae sefyllfa arian parod y Clwb wedi gwaethygu."

Mae Rygbi Caerdydd yn un o bedwar tîm rygbi undeb proffesiynol yng Nghymru

Dywedodd prif weithredwr URC, Abi Tierney fod angen i rygbi proffesiynol gael ei gadw yng Nghaerdydd.

"Y chwaraewr, y staff a'r cefnogwyr yw'n blaenoriaeth," meddai Abi Tierney.

"Gallant fod yn sicr y bydd rygbi proffesiynol yn parhau ym Mharc yr Arfau.

"Rydym wedi bod mewn cyswllt agos â Bwrdd Rygbi Caerdydd am fisoedd unwaith y gwnaethon nhw ddod yn ymwybodol o'r risg nad oedd cyllid cyfranddalwyr ar gael.

"O ganlyniad, mae URC wedi gallu ymateb yn sydyn i roi cefnogaeth i Gaerdydd."

Mae Ms Tierney wedi nodi mai ateb dros dro fydd hwn gydag URC yn edrych i ddychwelyd Caerdydd i berchnogaeth breifat.

Dywedodd URC mai Caerdydd yw'r mwyaf o'r pedwar clwb proffesiynol yng Nghymru, gyda'r boblogaeth o fewn y rhanbarth yn cynnwys mwy o glybiau a mwy o ysgolion nag unrhyw un arall.

Fe wnaeth staff Caerdydd, gan gynnwys chwaraewyr a hyfforddwyr, gynnal cyfarfod brys brynhawn Mawrth gyda'r prif weithredwr, Richard Holland.

Dywedodd cadeirydd Rygbi Caerdydd, Alun Jones mai'r "flaenoriaeth yw sicrhau ein staff, dyfodol y clwb a llwybr rygbi yn y brifddinas a'r rhanbarth yn ehangach".

"Rydym yn hynod ddiolchgar i Undeb Rygbi Cymru am sicrhau sefydlogrwydd ariannol a sicrhau bod rygbi proffesiynol yn parhau yng Nghaerdydd wrth i ni nesáu at dymor 150," meddai Mr Jones.