Llai o bobl yn derbyn brechiad ffliw yn ychwanegu at bwysau ysbytai

Mae disgwyl i nifer yr achosion o ffliw gyrraedd uchafbwynt yn ystod yr wythnosau nesaf

Mae'r ffaith bod llai o bobl wedi cael brechlyn rhag y ffliw eleni wedi arwain at gynnydd mewn achosion, yn ôl Iechyd Cyhoeddus Cymru (ICC).

Y gred yw y bydd nifer yr achosion yn cyrraedd uchafbwynt yn ystod yr wythnosau nesaf, gan ychwanegu at faich ysbytai sydd eisoes dan bwysau.

Mae llai o bobl oedrannus a gweithwyr gofal iechyd wedi derbyn brechlyn o'i gymharu â'r adeg hon y llynedd, yn ôl cyfarwyddwr yr ICC Dr Giri Shankar.

"Mae'r darlun presennol yn awgrymu bod cynnydd yng ngweithgarwch firysau anadlol tymhorol (RSV)," meddai.

Dywedodd Dr Shankar fod ffigyrau'n awgrymu bod achosion RSV eisoes wedi cyrraedd y brig, tra bod niferoedd Covid yn parhau i fod yn "sefydlog".

Er hyn, dywedodd hefyd fod disgwyl i nifer yr achosion o'r ffliw godi ymhellach a bod "cyfraddau yn uwch o'i gymharu â'r un cyfnod y llynedd".

"Rydym yn amlwg yn poeni am y cynnydd mewn achosion o'r ffliw," meddai.

"Rydym yn deall fod y ffliw yn gallu bod yn arbennig o ddifrifol i unigolion sydd â rhai cyflyrau meddygol, yn enwedig pobl ifanc iawn neu bobl mewn oed."

Ychwanegodd mai "brechu yw'r ymyriad pwysicaf a all amddiffyn pobl, unigolion, teuluoedd a chymunedau".

Ddim yn rhy hwyr i gael brechiad

Er hyn, dywedodd Dr Shankar nad oedd y nifer a dderbyniodd brechlyn eleni "cystal ag y byddem wedi hoffi iddo fod".

"Mae'r nifer sy'n derbyn brechiad ffliw (ymhlith y rhai dros 65 oed) rhwng 65-70% ar draws gwahanol fyrddau iechyd Cymru. Tua 73% oedd y ffigwr y llynedd.

"Yn yr un modd, mewn gweithwyr gofal iechyd, ar hyn o bryd mae'n 27%. Roedden ni tua 33% y llynedd."

Awgrymodd y gallai'r ffaith fod llai o weithwyr gofal iechyd wedi derbyn brechlyn ychwanegu at y pwysau ar wasanaethau os yw staff yn treulio amser i ffwrdd o'r gwaith oherwydd salwch.

"Rydym yn annog pobl sy'n gymwys i ddod ymlaen a chymryd y brechlyn," ychwanegodd.

"Nid yw fyth yn rhy hwyr i gymryd y brechlyn o fewn y tymor, a bydd y brechlyn sy'n cael ei gymryd nawr hefyd yn cynnig amddiffyniad sylweddol am weddill y tymor."