Tân gwyllt wedi 'saethu at dorf a tharo pobl' yn Sir Gâr

Mae rhieni'n dweud bod eu plant wedi “dychryn” ar ôl i dân gwyllt saethu i gyfeiriad y dorf mewn digwyddiad yn Sir Gaerfyrddin nos Fawrth.

Roedd plant yn sgrechian, meddai pobl leol, wrth i’r gwreichion “dasgu tuag at a dros y dorf” yn Neuadd Mynyddygarreg ger Cydweli.

Cafodd y gwasanaeth tân eu galw am tua 19:30 ond doedd dim angen i griw fynychu.

Dywedodd yr heddlu bod swyddog yn y digwyddiad wedi cael gwybod am anafiadau yn y dorf, ond bod y bobl hynny eisoes wedi gadael y safle.

Mae'r trefnwyr wedi cael cais am sylw.

'Anhrefn llwyr'

Dywedodd un rhiant, Danielle fod ei phlant, Sofia-Mai, pump, a Steffan, wyth, yn eistedd ym mlaen y dorf pan ddechreuodd y tân gwyllt “saethu tuag at y dorf a tharo pobl”.

"Roedden nhw wedi dychryn. Roedd yn llawn plant yn sgrechian o'n cwmpas, gan gynnwys fy rhai i," meddai.

“Fe lwyddon ni o’r diwedd i gael lle i fynd allan o’r dorf ond hyd yn oed pan oedden ni allan roedden ni’n gallu gweld ei fod yn dal i ddigwydd.”

Dywedodd fod ei gŵr, Emyr, wedi cael ei daro yn ei ysgwydd a bod gwreichion wedi glanio ar ei mab.

“Does neb mewn cysylltiad, hyd yn oed tra oedd yn digwydd a phobl yn sgrechian.

"Dydw i ddim yn gwybod pam y bydden nhw’n parhau yn lle dweud wrth bobl am adael.”

Dywedodd mam arall, Rhian, fod ei thri phlentyn wedi cael eu hysgwyd ar ôl y digwyddiad.

"Roedd yn rhaid i mi daro côt fy mab ar ôl iddo gael ei fwrw ger ei wddf,” meddai.

“Roedden nhw’n dod tuag aton ni, doedden ni ddim yn gwybod ble i droi, felly fe wnaethon ni ruthro i’r cefn.

"Roedd yn anhrefn llwyr. Fyddan nhw byth eisiau mynd i weld tân gwyllt eto."

Dywedodd nad oedd unrhyw un wedi cysylltu o’r Neuadd nac wedi ymddiheuro ar y cyfryngau cymdeithasol yn dilyn y digwyddiad.

Dywedodd llefarydd ar ran Gwasanaeth Tân ac Achub Canolbarth a Gorllewin Cymru eu bod wedi cael galwad am 19:26 ddydd Mawrth “ar ôl i dân gwyllt hedfan yn llorweddol dros dorf”.

“Fodd bynnag, nid oedd angen unrhyw griwiau i fynychu ac nid oedd angen unrhyw gamau pellach.”

Cafodd partner Alan Wall, Gemma, ei tharo yn ei hwyneb

Dywedodd rhiant arall, Alan Wall, fod cefn côt ei ferch wedi'i daro gan wreichionen tân gwyllt, a bod ei bartner wedi'i tharo yn ei hwyneb.

“Welon ni'r un cyntaf yn sgimio ar draws y gwair a'n ffrwydro o'n blaenau," meddai.

"Wedyn roedd yna rai eraill yn dod. Fe wnes i gydio yn fy merch a'i thynnu i mewn ataf oherwydd roedden nhw'n bownsio ym mhobman.

“Dyna pryd cafodd fy mhartner ei tharo yn ei hwyneb.”

Dywedodd iddo weld dawnsiwr a oedd yn y digwyddiad yn dod draw at blentyn gerllaw i weld os oedd hi'n iawn.

“Ni welais unrhyw drefnwyr yn dod draw. Roedd 'na lawer o dân gwyllt a aeth i ffwrdd yn y dorf. Roedd o'n dal i fynd, ac roedd pobl yn rhuthro i adael.”

Dywedodd Cyngor Sir Gâr nad ydyn nhw wedi derbyn cwynion am y digwyddiad, ac na fyddai angen trwydded gan yr awdurdod am ddigwyddiad o'r fath.