Bryn Terfel: Cael brechdan yn y Tŷ Gwyn gyda Clint Eastwood

Llŷr a Lisa fu'n busnesa yn nhŷ Bryn Terfel

Pan ddechreuodd canwr ifanc o Bant Glas gystadlu mewn eisteddfodau lleol, prin y byddai wedi dychmygu y byddai un diwrnod yn cyfarfod â rhai o enwau mawr y diwydiant adloniant, gan gynnwys un o'i arwyr o Hollywood.

Ond dyna sydd wedi digwydd i Syr Bryn Terfel, a hynny fwy nag unwaith ers i'w yrfa canu ei droi yn enw byd-enwog.

Bryn yw gwestai cyntaf podlediad newydd BBC Radio Cymru, Ding Dong! gyda Lisa a Llŷr , lle mae'r pâr priod, Lisa Gwilym a Llŷr Evans yn teithio Cymru yn busnesa yn nhai gwahanol selebs, gan glywed ambell i stori ddiddorol.

Ond fydd 'na stori yn curo rhai Syr Bryn am rwbio ysgwyddau gyda rhai o sêr mwya'r byd...?!

Clint Eastwood, brenin y Westerns i Bryn

Picio i'r Tŷ Gwyn am frechdan

Dwi'n cofio canu unwaith yn y Tŷ Gwyn yn Washington DC, yn y Kennedy Center Awards.

'Nes i dri ohonyn nhw; i Elizabeth Taylor, i James Levine yr arweinydd, ac unwaith i Jack Lemmon, yr actor, lle 'nes i ganu You'll Never Walk Alone o Carousel – cân sy'n cael ei chysylltu efo Lerpwl wrth gwrs, ond cân gan Rogers and Hammerstein ydi hi 'de!

Cyn y cyngerdd, mynd i'r Tŷ Gwyn am de a brechdan.

Wastad pan o'n i'n ifanc, o'n i'n gwylio Westerns efo Dad, ac o'dd Clint Eastwood yn bwysig yn tŷ ni. 'Nes i gerdded i mewn i'r stafell 'ma, a'r person cynta' 'nes i rwbio 'sgwyddau efo fo oedd Clint Eastwood!

O'n i'n syfrdan, ac o fewn eiliadau, o'dd y cyfle 'di mynd... Wrth gwrs, doedd o ddim 'di nghlywed i'n perfformio, doedd o ddim yn gwybod pwy o'n i!

Wedyn, ddaeth y noson lle o'n i'n canu i Mr Lemmon. A wedyn ddaeth yr actorion 'ma i gyd i gefn llwyfan, ac mi ddaeth yr hen Clint yn ôl at Bryn a d'eud "I enjoyed your performance", a ges i ddeud "mae nhad i wrth ei fodd efo'ch gwaith chi, a 'da chi'n gerddor arbennig" achos mae o'n cyfansoddi cerddoriaeth i'w ffilms.

'Swn i'n licio 'sa nhad wedi bod yna i'w gyfarfod o.

'Bryn, isn't it?'

Dwi newydd orffen yn Efrog Newydd, a chyfarfod dipyn o'r Cymry 'na; Matthew Rhys yn mynd â ni ar ei gwch, gweld Katherine Jenkins yn ei chartref newydd.

O'n i'n mynd o dŷ Katherine Jenkins ar ôl cinio ac o'n i'n cerdded adra, a 'nes i bwmpio fewn i Laurence Fishburne, o'dd yn The Matrix. O'dd rhaid i mi ddeud "Hello Laurence, how are you?!".

A digwydd bod, o'dd o tu ôl i fi yn un o nosweithiau'r Tŷ Gwyn, ac o'dd o'n cofio! "Bryn, isn't it?!"

"How do you remember that?!"

Dire Straits a Shirley Bassey

Pan o'n i'n ifanc, o'n i ddim yn wybodus am pwy oedd Syr Geraint Evans, Margaret Price neu Gwyneth Jones. O'dd well gen i Dire Straits a Queen ac Elvis. Ac o'dd fy mrawd i'n dilyn Pink Floyd.

Mae'r cysylltiadau dwi 'di cael o fewn ugain mlynedd i hynny... gweithio efo Roger Waters (Pink Floyd) ar opera 'nath o'i hysgrifennu, cyfarfod Mark Knopfler (Dire Straits) mewn noson i Tom Jones...

Dwi'n cofio pan es i weld Dire Straits yn y lle sglefrio rhew yng Nghaer; o'dd rhaid i ti symud am bod dy draed di'n oer!

Mae pethau fel'ma yn dod yn sgil dy waith di. Ti'n cael cynigion campus fel canu yn agoriad Cwpan Rygbi'r Byd; fi a Shirley Bassey yng nghanol y cae yn morio canu.

Bryn a Shirley yn 'morio canu' yn seremoni agoriadol Cwpan Rygbi'r Byd 1999 yn Stadiwm y Mileniwm

A maen nhw'n dod i dy weld di'n perfformio mewn Tŷ Opera, a weithiau ti'n meddwl "pam odda nhw yna?" Fel Sandra Bullock – mae ei rhieni hi'n gantorion opera - a Taylor Swift – mae ei nain hi yn gantores opera.

Mae'r rhan fwyaf yn bobl arbennig o glên ac yn mwynhau be' ti'n ei 'neud.