Symud byrllysg y Senedd tra'n adnewyddu'r Siambr

Roedd y byrllysg yn rhodd gan Senedd De Cymru Newydd yn Awstralia

Wrth i'r gwaith adeiladu ar siambr y Senedd barhau, mae byrllysg seremonïol y sefydliad wedi ei symud.

Mae'n rhaid ehangu'r siambr i greu lle ar gyfer mwy o Aelodau o'r Senedd yn dilyn yr etholiad nesaf.

Bydd 36 o wleidyddion ychwanegol yn cael eu hethol ym Mai 2026 gan ddod â'r cyfanswm i 96.

Bydd y byrllysg yn cael ei ailosod yn yr hen siambr ddadlau yn yr adeilad drws nesaf, ble bydd yr Aelodau'n eistedd tra bo'r newidiadau'n digwydd.

Y byrllysg yn cael ei roi mewn bocs er mwyn ei symud

Mae'r byrllysg - sydd wedi ei wneud o aur, arian a phres - yn eistedd o flaen y Llywydd.

Cafodd ei roi i'r Senedd yn rhodd gan Senedd De Cymru Newydd yn Awstralia.

Yn dilyn etholiad, caiff y byrllysg ei osod yn ei briod le yn y siambr drafod i nodi agoriad swyddogol y Senedd.

Mae angen ehangu'r siambr i greu lle ar gyfer y 36 yn rhagor o ASau

Mae'r byrllysg yn cael ei symud achos bod yn rhaid i'r Aelodau adael y siambr o ganlyniad i'r gwaith adeiladu sy'n digwydd yno.

Mae angen ehangu'r siambr i greu lle ar gyfer y 36 yn rhagor o ASau fydd yn cael eu hethol fis Mai nesaf.

Dywedodd llefarydd ar ran y Senedd bod £2.8m wedi ei neilltuo i dalu am y newidiadau i'r siambr.

Am y flwyddyn nesaf, bydd yr ASau yn eistedd yn hen siambr Tŷ Hywel yn yr adeilad y tu ôl i'r Senedd ble bydd y byrllysg yn cael ei osod.

Yn siambr Tŷ Hywel y gwnaeth y Cynulliad, fel ag yr oedd, ymgynnull rhwng 1999 a 2006.

Beth arall sy'n newid?

Yn ogystal â chynnydd i nifer yr aelodau, mae'r modd y caiff ASau eu hethol yn newid hefyd.

Mae Cymru'n cael ei rhannu'n 16 etholaeth a bydd pob un yn cael ei chynrychioli gan chwe Aelod fydd wedi eu hethol drwy drefn gyfrannol.

Mae'r newidiadau'n digwydd yn dilyn cytundeb rhwng Llafur a Phlaid Cymru.

Mae cefnogwyr y newidiadau'n dweud bod angen mwy o ASau i adlewyrchu'r cyfrifoldebau ychwanegol sydd gan y Senedd erbyn hyn o gymharu â dechrau datganoli ym 1999.

Ond mae gwrthwynebwyr, gan gynnwys y Ceidwadwyr Cymreig, yn dweud bod y newidiadau'n wastraff arian.