Undeb Rygbi Cymru'n ystyried haneru nifer y rhanbarthau

Cynrychiolwyr o'r Gweilch, Caerdydd, y Dreigiau a'r Scarlets yn ystod gemau Dydd y Farn mis Ebrill

Mae Undeb Rygbi Cymru'n ystyried haneru nifer y rhanbarthau proffesiynol yng Nghymru ar gyfer tymor 2027/28.

Mae'r corff llywodraethu'n dweud eu bod yn dechrau ymgynghoriad ffurfiol gyda'r bwrdd rygbi proffesiynol a allai leihau nifer y rhanbarthau i dri neu hyd yn oed i ddau.

Mewn datganiad, dywedodd yr Undeb fod y system bresennol yn methu ac yn anghynaladwy, ar ôl cadarnhau eisoes nad ydyn nhw'n bwriadu parhau i ariannu pedwar tîm proffesiynol yn gyfartal yng ngêm y dynion.

Caerdydd, y Dreigiau, y Gweilch a'r Scarlets yw'r pedwar tîm presennol, gydag Undeb Rygbi Cymru'n dweud eu bod am gael strategaeth "fwy radical" yn barod erbyn mis Hydref.

Fe ddaw hyn ar ôl i dîm rygbi Cymru gael eu tymor gwaethaf erioed yn hanes gêm y dynion.

Maen nhw wedi colli naw allan o 10 gêm a arweiniodd at rediad o 18 gêm wedi'u colli'n olynol - a ddaeth i ben y penwythnos diwethaf pan guron nhw Japan 31-22 yn yr ail brawf.

Mewn datganiad dywedodd yr Undeb: "Dyw'r system rygbi bresennol yng Nghymru, sy'n cynnwys timau cenedlaethol, clybiau proffesiynol, clybiau cymunedol, academïau, prifysgolion ac ysgolion, ddim yn cyflawni llwyddiant cyson ar y cae ac nid yw'n gynaliadwy'n ariannol ar hyn o bryd.

"Felly mae Undeb Rygbi Cymru'n ystyried strategaeth fwy radical sy'n canolbwyntio ar wneud y mwyaf o fuddsoddiad a diwygio strwythur cyfan rygbi proffesiynol yng Nghymru, ymhlith opsiynau eraill."

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.