Gwasanaeth Ambiwlans Cymru'n penodi prif weithredwr newydd

Mi fydd Emma Wood yn dechrau yn ei rôl yn swyddogol ym mis Hydref

Prif weithredwr newydd Gwasanaeth Ambiwlans Cymru fydd Emma Wood.

Daw ar ôl i gyn-bennaeth y gwasanaeth, Jason Killens, adael i gymryd yr awenau fel prif weithredwr y gwasanaeth ambiwlans yn Llundain ar ôl saith mlynedd wrth y llyw.

Mae Emma Wood wedi wedi cael profiad blaenorol fel uwch swyddog yn y GIG a gwasanaethau brys, ac wedi cael profiad fel cyfarwyddwr bwrdd am dros ddau ddegawd.

Dywedodd ei bod yn "anrhydedd mawr cael ymuno â Gwasanaeth Ambiwlans Cymru yn ystod cyfnod mor bwysig yn ei hanes".

Mi fydd yn gadael Ymddiriedolaeth Sefydledig GIG Ysbytai Prifysgol Bryste a Weston, lle mae wedi gwasanaethu fel Prif Swyddog Pobl a Dirprwy Brif Swyddog Gweithredol.

Mae Cadeirydd yr Ymddiriedolaeth, Colin Dennis yn dweud y bydd yn "dod â chyfoeth o brofiad o arweinyddiaeth ac angerdd clir dros bobl a gwella gwasanaethau".

Mi fydd hi'n dechrau yn ei rôl yn swyddogol ym mis Hydref.

Mewn cyfweliad ym Mehefin wrth adael y swydd, dywedodd Mr Killens bod yr oedi i gleifion oherwydd bod ambiwlansys yn gorfod aros y tu allan i ysbytai Cymru yn "anghynaladwy, annerbyniol".

Mae'n gadael y gwasanaeth mewn sefyllfa ble mae'r oedi pedair gwaith yn hirach na phan ddechreuodd y swydd.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.