Rhybuddion llifogydd mewn grym yn dilyn glaw dros nos

Roedd 'na rybudd oren am law trwm wedi dod i rym am 15:00 brynhawn Sul ac wedi para nes 06:00 fore Llun

Mae Cyfoeth Naturiol Cymru wedi wedi cyhoeddi nifer o rybuddion llifogydd fore Llun - yn cynnwys nifer o rybuddion coch sy'n golygu bod angen gweithredu.

Dywed y Swyddfa Dywydd bod llifogydd yn debygol mewn mannau ac y gallai'r tywydd garw amharu ar wasanaethau trafnidiaeth gyhoeddus ac achosi trafferthion ar y ffyrdd.

Mae'r tywydd garw wedi effeithio ar ambell ffordd yn Sir Fynwy, gallwch weld y diweddaraf ar ffyrdd Cymru yma.

Yn Rhondda Cynon Taf, mae llifogydd wedi rhwystro rheilffyrdd rhwng Pontypridd ac Aberdâr, ac mae 'na wasanaeth bws yn rhedeg rhwng y ddau dref yn lle trenau.

Mae'r cyngor yn darparu bagiau tywod i leoliadau ar draws y sir.

Roedd 'na rybudd oren am law trwm wedi dod i rym am 15:00 brynhawn Sul ac wedi para nes 06:00 fore Llun.

Roedd y rhybudd oren yn berthnasol i 14 o siroedd yn y de; Abertawe, Blaenau Gwent, Bro Morgannwg, Caerffili, Caerdydd, Caerfyrddin, Casnewydd, Castell-nedd Port Talbot, Mynwy, Merthyr Tudful, Pen-y-bont ar Ogwr, Powys, Rhondda Cynon Taf a Thorfaen.

Roedd y Swyddfa Dywydd hefyd wedi gosod rhybudd melyn am wyntoedd cryfion i Gymru gyfan ddydd Sul.

Dywedodd y Swyddfa Dywydd fod hyrddiadau 70mya yn bosib mewn mannau arfordirol, ac y gallai gael effaith ar drafnidiaeth a chyflenwadau trydan.

Daeth rhybudd melyn am law trwm mewn ardaloedd yn y de a'r canolbarth hefyd i ben am 08:00 fore Llun.