Disgwyl mai Darren Millar fydd arweinydd y Ceidwadwyr yn y Senedd

Ar hyn o bryd, Darren Millar yw prif chwip y Ceidwadwyr yn y Senedd

Mae'n edrych bron yn anochel taw Darren Millar fydd arweinydd nesaf y Ceidwadwyr yn y Senedd.

Mae'n ymddangos fel bod y grŵp wedi uno o amgylch yr un ymgeisydd, ac felly ni fyddai unrhyw gystadleuaeth.

Hyd yn hyn dim ond Mr Millar sydd wedi cyhoeddi ei fwriad i sefyll yn y ras i olynu Andrew RT Davies, a bydd angen i unrhyw ddarpar ymgeisydd gael enwebiadau gan dri AS arall erbyn 17:00 ddydd Iau.

Mae gan Mr Millar gefnogaeth gyhoeddus yr ASau Andrew RT Davies, y cyn-arweinydd Paul Davies, Russell George, Tom Giffard, Altaf Hussain, Gareth Davies, James Evans, Joel James, Peter Fox, Janet Finch-Saunders, Samuel Kurtz a Natasha Asghar.

Felly does dim digon o ASau ar ôl i gyrraedd y trothwy o dri enwebiad sydd eu hangen i gefnogi ymgeisydd amgen.

Pe bai’n cael ei gadarnhau, Mr Millar fyddai’r trydydd arweinydd i gymryd rheolaeth dros blaid Gymreig yn y Senedd heb bleidlais gan aelodau mewn dwy flynedd – ochr yn ochr ag Eluned Morgan dros Lafur a Rhun ap Iorwerth dros Blaid Cymru.

Byddai'n arwain y blaid yn etholiad y Senedd 2026, lle mae arolygon barn diweddar wedi awgrymu bod y blaid yn y pedwerydd safle, y tu ôl i Blaid Cymru, Llafur a Reform.

Pwy yw Darren Millar?

Ar hyn o bryd, ef yw prif chwip y Ceidwadwyr yn y Senedd a'u llefarydd ar y cyfansoddiad a gogledd Cymru.

Cafodd ei ailbenodi i rôl mainc flaen y Ceidwadwyr yn 2021 wedi iddo roi'r gorau i'r swydd yn dilyn ffrae dros yfed alcohol.

Roedd yn feirniad croch o Lywodraeth Cymru pan oedd yn llefarydd iechyd y blaid, gyda Bwrdd Iechyd Prifysgol Betsi Cadwaladr Gogledd o dan ei lach yn aml.

Bu’n gadeirydd Pwyllgor Cyfrifon Cyhoeddus dylanwadol y Senedd.

Mae’n ymddiriedolwr elusen Gristnogol, Sefydliad Evan Roberts, sydd wedi denu beirniadaeth am ei chysylltiad â gweinidog o’r enw Yang Tuck Yoong, a gafodd ei feirniadu am safbwyntiau homoffobig. Mae Millar wedi dweud nad yw’n cefnogi’r safbwyntiau hynny.

Mae'n disgrifio ei hun fel "Cristion ymroddedig, yn ddarllenydd brwd ac yn seryddwr amatur".

Mae'n edrych bron yn anochel taw Darren Millar fydd arweinydd nesaf y Ceidwadwyr yn y Senedd

Mae wedi cynrychioli Gorllewin Clwyd yn y Senedd ers 2007.

Dywedodd ei fod, cyn cael ei ethol i'r Senedd, yn gweithio "fel rheolwr i elusen ryngwladol yn cefnogi Cristnogion sy’n cael eu herlid ar draws y byd. At hynny, bu’n gyfrifydd yn gweithio yn y diwydiannau adeiladu, cartrefi gofal a thelathrebu."

Mae'n byw ym Mae Cinmel gyda'i wraig a'u dau blentyn.

Dadnsoddiad

Gohebydd gwleidyddol BBC Cymru, Daniel Davies

Ar ddiwedd blwyddyn o newid mawr gwleidyddol, mae Ceidwadwyr y Senedd yn ei gorffen yn yr un sefyllfa â’r Blaid Lafur.

Yn y ddwy blaid, mae arweinwyr wedi cael eu disodli - Vaughan Gething aeth yn gyntaf; nawr Andrew RT Davies.

Ond nid eu beirniaid sy’n etifeddu’r goron.

Yn y naill blaid, mae aelodau’r Senedd wedi coroni rhywun maen nhw’n gobeithio uno y tu ôl iddyn nhw - Eluned Morgan a, siŵr o fod, Darren Millar.

Mae gan y ddau wleidydd rhywbeth arall yn gyffredin - etholiad i’r Senedd yn 2026, sy’n addo bod yn anodd dros ben i’w pleidiau.

Dywedodd Darren Millar wrth y BBC fore Mercher ei fod yn credu mai fe yw'r ymgeisydd all "uno'r blaid" yng Nghymru.

Fe wnaeth Mr Millar gefnogi Andrew RT Davies yn y bleidlais hyder a'i ddisgrifio fel "arweinydd aruthrol sydd wedi cyfrannu at Gymru a'r Senedd".

"Mae wedi ein harwain gyda rhagoriaeth am ymhell dros ddegawd," meddai.

“Dyna’r etifeddiaeth rydw i eisiau adeiladu arni a pham rydw i wedi cynnig fy hun i fod yn arweinydd nesaf grŵp y Senedd.

“Mae’n rhaid i ni fynd yn ôl at ddwyn Llywodraeth Cymru i gyfrif ac mae’n rhaid i hynny fod yn ffocws i ni.

"Rwy'n optimistaidd am y dyfodol," ychwanegodd.