Beth i ddisgwyl gan Wrecsam wrth i dymor newydd ddechrau

Mae Phil Parkinson yn paratoi ar gyfer ei bumed tymor fel rheolwr Wrecsam

Bydd Wrecsam yn chwarae yn yr ail haen am y tro cyntaf ers 1981-82 ddydd Sadwrn wrth iddyn nhw wynebu Southampton yn y Bencampwriaeth.

Ar ôl sicrhau dyrchafiad dair blynedd yn olynol, beth all cefnogwyr tîm Phil Parkinson ei ddisgwyl y tymor yma?

Beth yw'r disgwyliadau?

Mae Wrecsam wedi mynd o nerth i nerth ers i Ryan Reynolds a Rob McElhenney brynu'r clwb yn y Gynghrair Genedlaethol ychydig dros bedair blynedd yn ôl.

Mae eu gwariant yr haf hwn - gyda mwy i ddod - yn cefnogi'r awgrym eu bod yn anelu at ddyrchafiad gymharol sydyn i'r Uwch Gynghrair.

Ond hefyd, mae ymwybyddiaeth eu bod nhw'n cymryd cam enfawr i fyny y tro hwn - gyda llawer o'u gwrthwynebwyr yn cael cefnogaeth ariannol gryf iawn.

Prynodd Rob McElhenney a Ryan Reynolds Wrecsam pan oedd y clwb yn y Gynghrair Genedlaethol

Beth yw prif gryfderau'r tîm?

Mae'r clwb wedi arwyddo chwaraewyr gyda phrofiad o chwarae yn y Bencampwriaeth - Lewis O'Brien, Ryan Hardie a Josh Windass - yn ogystal â rhai gyda phrofiad rhyngwladol fel Conor Coady, Danny Ward, Liberato Cacace a Kieffer Moore.

Dylen nhw fod â'r dyfnder i fod yn gystadleuol. Ond mae Phil Parkinson hefyd yn gwybod pa mor anodd yw'r Bencampwriaeth.

Os gall unrhyw un lywio'r clwb trwy gyfnodau anoddach y tymor hwn, Parkinson yw'r dyn.

A beth yw'r gwendidau?

Gallai fod yn anodd dod â'r holl chwaraewyr hynny at ei gilydd a ffurfio uned.

Mae Parkinson wedi gwneud gwaith da o esblygu ei garfan wrth gynnal cytgord ymhlith ei chwaraewyr wrth iddyn nhw symud i fyny'r cynghreiriau.

Ond bydd newidiadau'r haf hwn yn profi'r sgiliau rheoli hynny yn fwy nag erioed.

Bydd safon y gwrthwynebwyr yn wythnosol yn sylweddol uwch na'r hyn a wynebodd y garfan y tymor diwethaf hefyd.

Mae ymosodwr Cymru Kieffer Moore yn un o wyth chwaraewr sydd wedi ymuno â Wrecsam yr haf hwn

Pwy allai wneud gwahaniaeth?

Dewiswch o blith y chwaraewyr trawiadol.

Bydd chwaraewyr fel Windass a Hardie yn ychwanegu creadigrwydd a goliau ond gallai Coady ac O'Brien chwarae rolau allweddol ar y cae ac oddi arno – dau chwaraewr rhagorol ar y lefel yma a all helpu i feithrin ysbryd tîm cryf.

Mae cynnyrch yr academi, Max Cleworth, wedi bod yn rhan enfawr o lwyddiant diweddar Wrecsam ac mae wedi cael ei awgrymu'n rheolaidd y bydd yn disgleirio ar lefel y Bencampwriaeth. Y tymor hwn, bydd yn cael ei gyfle i wneud hynny.

Bydd y clwb yn arwyddo mwy?

Bydd y clwb yn sicr o fod yn weithgar yng nghyfnodau olaf ffenestr drosglwyddo'r haf.

Mae'r Dreigiau Coch eisoes wedi recriwtio wyth chwaraewr cyn y daith i Stadiwm St Mary's tra eu bod hefyd wedi cael eu cysylltu â symudiadau am chwaraewyr Cymru Nathan Broadhead a Lewis Koumas a Sivert Mannsverk o Ajax.

Ond bydd angen i bobl adael y clwb hefyd.

Yn barod, mae Paul Mullin wedi ymuno â Wigan Athletic ar fenthyg - gyda Mo Faal yn symud i Port Vale ar fenthyg wythnos yma hefyd.

Mae'r cefnwr chwith Jacob Mendy yn denu diddordeb gan glybiau eraill tra bod yr ymosodwr Ollie Palmer yn debygol o adael dros yr wythnosau nesaf.

Sut mae Parkinson yn teimlo?

"Llwyddiant i Wrecsam yw, erbyn diwedd y tymor, ein bod wedi parhau i gynrychioli'r clwb pêl-droed gwych hwn yn y ffordd yr ydym wedi gwneud dros y pedair blynedd diwethaf," dywedodd Parkinson.

"Os gwnawn ni hynny, byddaf yn falch iawn a byddwn yn gweld ble mae hynny'n mynd â ni."

Mae'n amlwg nad yw Phil Parkinson eisiau rhoi unrhyw bwysau ar ei chwaraewyr.

Ond yn breifat, mae'n ymddangos bod y clwb yn anelu at ddyrchafiad i'r Uwch Gynghrair yn y ddwy flynedd nesaf.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.