Pobl yn cael mynd adref ar ôl i lyncdwll Merthyr Tudful gael ei lenwi

Mae pobl sy'n byw yn agos i lyncdwll ym Merthyr Tudful wedi cael dychwelyd adref i'w cartrefi ar ôl iddo gael ei lenwi.

Roedd y twll yn ystâd Nant Morlais ym mhentref Pant - sy'n cynnwys tua 30 o dai - wedi ymddangos ar 1 Rhagfyr.

Dywedodd Cyngor Merthyr Tudful ddydd Mercher eu bod yn gweithio gyda chontractwyr i gael datrysiad parhaol.

Ychwanegodd y llefarydd y bydd mwy o wybodaeth yn cael ei rannu yn y flwyddyn newydd.

Y gred oedd bod ffos wedi cwympo gan achosi'r llyncdwll

Yn ôl Cyngor Merthyr Tudful, tirlithriadau yn sgil Storm Bert wnaeth achosi'r twll - a oedd rhwng 9-12m mewn dyfnder a phum metr mewn lled.

Dechreuodd rhai pobl ddychwelyd i'w tai yr wythnos diwethaf, gyda'r cyngor yn obeithiol y byddai'r gweddill yn cael mynd adref erbyn canol wythnos yma.