Plentyn heb ei weld gan staff amddiffyn yn y mis cyn ei farwolaeth - llys

Bu farw Ethan Ives-Griffiths yn ddwy oed ar 16 Awst 2021

Rhybudd: Gallai'r cynnwys isod beri gofid i rai

Ni chafodd plentyn bach a fu farw o anaf trychinebus i'w ymennydd ei weld gan staff amddiffyn plant yn ystod y mis cyn ei farwolaeth er ei fod ar y gofrestr amddiffyn plant, mae llys wedi clywed.

Bu farw Ethan Ives-Griffiths, oedd yn ddwy oed, ar 16 Awst 2021 ar ôl cwympo yng nghartref ei nain a'i daid.

Mae taid Ethan, Michael Ives, 47, a'i nain Kerry Ives, 46 o Garden City, Sir y Fflint wedi'u cyhuddo o lofruddiaeth, achosi neu ganiatáu marwolaeth plentyn a chreulondeb i blentyn.

Mae mam Ethan, Shannon Ives, 28, o'r Wyddgrug, wedi'i chyhuddo o achosi neu ganiatáu marwolaeth plentyn a chreulondeb i blentyn.

Mae'r tri yn gwadu'r cyhuddiadau.

Ddydd Mawrth clywodd Llys y Goron Yr Wyddgrug dystiolaeth gan Dr Sarah Dixon, ymgynghorydd pediatrig a wnaeth adolygu'r achos ar gais Heddlu Gogledd Cymru.

Dywedodd fod Ethan yn rhan o'r cynllun amddiffyn plant a'i fod wedi'i roi ar y gofrestr amddiffyn plant ar 19 Gorffennaf 2021 wedi digwyddiad domestig yn y cartef teuluol pan symudodd Shannon Ives allan.

Mae plant sy'n rhan o gynlluniau amddiffyn i fod i gael eu gweld o leiaf unwaith bob 10 diwrnod gwaith gan uwch-swyddog, meddai Dr Dixon, ac mae disgwyl i un cyfarfod gael ei gynnal bob pedair wythnos yng nghartref y plentyn.

Ychwanegodd fod cofnodion yn dangos "bod sawl ymgais wedi bod i weithredu'r cynllun ond bod ymdrechion i gysylltu â mam Ethan wedi bod yn aflwyddiannus".

Dywedodd Dr Dixon fod Shannon Ives wedi canslo ymweliad ag ymwelydd iechyd ar 13 Awst ar ôl i Ethan gwympo gartref a bod yn anymwybodol am 10 munud.

Clywodd y rheithgor mai'r rheswm a roddwyd dros ganslo'r ymweliad oedd bod Ethan "ddim yn teimlo'n dda oherwydd problemau cysgu".

Yn lle hynny, aeth y teulu ag ef i archfarchnad.

Cafodd Ethan Ives Griffiths ei ddarganfod wedi ei anafu yng nghartref ei nain a'i daid ar Lannau Dyfrdwy yn 2021

Daeth adroddiad Dr Dixon i'r casgliad: "Dylai Ethan fod wedi cael mynd am asesiad meddygol brys. Roedd methiant i wneud hynny yn anghyfrifol iawn."

Ychwanegodd fod mynd ag ef i siopa yn lle hynny yn weithred "anghyffredin" ac yn "gwbl amhriodol".

Ar ôl iddo gwympo eto'r diwrnod canlynol roedd Ethan yn anymwybodol a ddaeth e ddim at ei hun wedi hynny.

Gofynnwyd i Dr Dixon am iechyd a datblygiad cyffredinol Ethan a dywedodd hyd at ei asesiad iechyd diwethaf ei fod yn "normal o ran datblygiad" ac yn "fachgen iach" heb "unrhyw duedd gynyddol i faglu neu syrthio".

Cofnododd archwiliad post mortem Ethan 40 o anafiadau allanol.

Mae'r achos yn parhau.