Dyn, 33, yn y llys wedi ei gyhuddo o lofruddio dynes 69 oed

Bydd Dean Mark Albert Mears yn ymddangos yn Llys y Goron Yr Wyddgrug ddydd Mawrth

Mae dyn 33 oed wedi ymddangos yn y llys wedi'i gyhuddo o lofruddio dynes 69 oed yn Y Rhyl.

Cafodd Heddlu'r Gogledd eu galw i dŷ ar Ffordd Cefndy yn y dref nos Iau.

Bu farw Catherine Flynn ar ôl iddi gael ei chludo i'r ysbyty gydag anafiadau difrifol.

Clywodd Llys Ynadon Llandudno ddydd Llun fod Dean Mark Albert Mears, o Rodfa Bodelwyddan ym Mae Cinmel, hefyd yn wynebu cyhuddiad o fwrgleriaeth waethygedig (aggravated burglary).

Ddydd Mawrth, ymddangosodd yn Llys y Goron Yr Wyddgrug, ac fe gafodd ei gadw yn y ddalfa nes ei ymddangosiad nesaf ym mis Chwefror.