Chwarter ASau Llafur ddim am sefyll yn etholiad 2026

Mae Julie Morgan wedi bod yn aelod dros Ogledd Caerdydd ers 2011

Mae'r Aelod o'r Senedd Julie Morgan wedi cyhoeddi na fydd yn ceisio cael ei hethol yn 2026.

Dywedodd y bu'n "anrhydedd" i fod yn aelod dros Ogledd Caerdydd ers 2011.

Mae'r cyhoeddiad diweddaraf yn golygu y bydd o leiaf chwarter yr ASau Llafur presennol yn rhoi'r gorau iddi y flwyddyn nesaf.

Y gweddill sydd eisoes wedi cyhoeddi na fyddan nhw'n dychwelyd i Fae Caerdydd yw'r cyn-brif weinidogion Mark Drakeford a Vaughan Gething, gweinidog yr economi Rebecca Evans, y dirprwy weinidog Dawn Bowden, y cyn-ddirprwy weinidog Lee Waters, y cyn-Gwnsler Cyffredinol Mick Antoniw ac AS canolbarth a gorllewin Cymru Joyce Watson.

Ym 1997 etholwyd Julie Morgan yn AS dros Ogledd Caerdydd - y fenyw gyntaf i gynrychioli Caerdydd yn San Steffan ac un o'r 13 o fenywod yn unig sydd erioed wedi bod yn ASau Cymreig.

Roedd yn AS am 13 mlynedd nes iddi golli'r sedd o 194 pleidlais yn 2010.

Cafodd ei geni yng Nghaerdydd a'i haddysgu yn Ysgol Gynradd Dinas Powys, Ysgol Howell's yng Nghaerdydd, Coleg y Brenin Llundain, Prifysgol Manceinion a Phrifysgol Caerdydd.

Mae'n gyn-gyfarwyddwr cynorthwyol i Barnardo's yng Nghymru.

Roedd hefyd yn gynghorydd ar Gyngor De Morgannwg o 1985 i 1997.

Bu farw ei gŵr, y cyn-brif weinidog Rhodri Morgan, yn 2017.