20mya 'werth o' medd cynghorydd a gollodd frawd
Fe gollodd Gareth Parry ei frawd, Keith, yn dilyn gwrthdrawiad ym 1994
- Cyhoeddwyd
Mae cynghorydd o Wynedd a gollodd ei frawd ar ôl gwrthdrawiad yn dweud fod y newid i 20mya yn "ffantastig".
Bu farw Keith Parry yn 1994 a dywed ei frawd, Gareth Parry, fod y newid "werth o os all achub un bywyd".
Daeth deddf newydd i rym ddydd Sul sy'n golygu bod terfyn cyflymder nifer fawr o ffyrdd trefol Cymru bellach wedi gostwng i 20mya.
Mae yna wrthwynebiad i'r polisi gan rai, er bod gan gynghorau sir hawl i osod eithriadau ble mae terfyn o 30mya yn fwy priodol.
- Cyhoeddwyd18 Medi 2023
- Cyhoeddwyd15 Medi 2023
- Cyhoeddwyd15 Medi 2023
"Dw i o'i blaid o 100%. Gollis i'm mrawd... gan gar oedd yn neud 30mya a ddaeth o erioed adra'," dywedodd y Cynghorydd Gareth Parry.
"Os fedar o achub un accident arall, mae o werth o dydy.
"Dw i'm isio i'r un teulu arall fynd drwy beth aeth ein teulu ni, a dal i fynd drwyddo fo rwan.
"'Sna'm diwrnod yn mynd lle 'dan ni'm yn meddwl am Keith.
"Pan 'dan ni'n mynd am beint, dio'm ots be 'dan ni'n 'neud."
![Cynghorydd Gareth Parry](https://ichef.bbci.co.uk/ace/standard/2560/cpsprodpb/50b1/live/da72be20-55f7-11ee-86d5-1303193fb263.jpg)
Dywed y Cynghorydd Gareth Parry fod y newid i 20mya yn "ffantastig"
Fe bleidleisiodd y Cynghorydd Parry o blaid y newid i 20mya yn lle 30mya ar ffordd yn Llanberis - yn wahanol i rai o'i gyd-gynghorwyr.
Dywedodd: "Dw i isio fo i fod yn 20mya all the way.
"Dw i'm isio bod y cynghorydd, os oes 'na ddamwain yn digwydd fan 'na yn 30mya zone a rhywun yn cael ei anafu, dw i'm isio d'eud o ia fi nath ddewis iddo fo fod yn 30mya.
"Dio'm yn mynd i gymryd faint? 50 eiliad yn fwy i ddod trwy 'na?"
![Keith Parry](https://ichef.bbci.co.uk/ace/standard/2048/cpsprodpb/4af8/live/d50694a0-55f9-11ee-83bb-5f9bffc8f569.jpg)
Bu farw Keith Parry yn yr ysbyty yn 1994 yn dilyn gwrthdrawiad
Mae pryderon gan rai yn lleol y byddai'r terfyn cyflymder is yn ei gwneud hi'n anoddach i dimau achub yn ardal Llanberis i gyrraedd argyfyngau.
Dywedodd y Cynghorydd Parry y dylai timau achub mynydd gael eu trin fel yr heddlu neu ambiwlans a bod hawl ganddyn nhw i fynd yn gynt "a chael golau glas" pan fo argyfwng.
"Arfar efo fo ydy o de."
![Arwydd 20 ar ffordd](https://ichef.bbci.co.uk/ace/standard/2048/cpsprodpb/6a65/live/7434daf0-55fa-11ee-8dec-25fa5698ad43.jpg)
Daeth deddf newydd i rym ddydd Sul sy'n golygu bod terfyn cyflymder nifer fawr o ffyrdd trefol Cymru bellach wedi gostwng i 20mya
Mae'r newid gafodd ei gyflwyno ddydd Sul wedi bod yn un dadleuol.
Mae'r Ceidwadwyr Cymreig wedi bod yn feirniadol o'r cynllun gan ddweud y bydd yn rhy ddrud ac yn arafu gwasanaethau brys.
Dywedodd y gweinidog dros drafnidiaeth yng Nghymru, Lee Waters, y bydd hi'n cymryd amser i ddod i arfer â'r newid.
Ond dywedodd mai achub bywydau yw'r nod.