Tanau gwair Ceredigion: 'Amser pryderus i'r ardal'

Roedd y tân sy'n llosgi yn ardal Ffair-rhos ac Ystrad Fflur yn bum milltir o hyd neithiwr

Mae tanau gwair wedi bod yn llosgi yng Ngheredigion ers sawl diwrnod, gyda chynghorwyr yn dweud bod hi'n "amser pryderus" i'r ardal.

Mae tân mawr yn ardal Cwm Rheidol, a rhai eraill yn y mynyddoedd yn ardaloedd Ystrad Fflur a Ffair-rhos hefyd.

Yn siarad ar Dros Frecwast fore Mawrth, dywedodd y Cynghorydd Ifan Davies ei fod yn credu bydd "y frigâd dân yma am rai dyddie eto," yn sgil tân Cwm Rheidol.

Mae criwiau tân o sawl ardal wedi bod yno'n cynorthwyo gyda cheisio rheoli'r fflamau, ac wedi bod wrthi ers sawl diwrnod bellach.

Dywedodd y gwasanaeth tân eu bod wedi bod yn brysur yn delio gyda thanau gwair ar draws y canolbarth a'r de dros nos.

Mae gwasanaeth y Canolbarth a'r Gorllewin yn gofyn i bobl ffonio 999 dim ond os ydy eu bywydau neu gartrefi mewn perygl, gan eu bod yn delio â nifer o alwadau.

Dywedodd Gwasanaeth Tân ac Achub Canolbarth a Gorllewin Cymru bod y tân yn ardal Ffair-rhos ac Ystrad Fflur yn ymestyn dros 2,500 hectar o dir bellach.

"Ni 'ma am y trydydd diwrnod nawr," meddai Emyr Jones o'r gwasanaeth.

"Mae'n newid trwy'r amser, mae sawl tân gwahanol yn yr ardal.

"Ar un pwynt neithiwr o'dd pum milltir o dân 'da ni, sy'n dangos faint o waith yw e, a'r tirwedd ni'n gorfod cael y criwiau mewn i."

"Ar un pwynt neithiwr o'dd pum milltir o dân 'da ni," meddai Emyr Jones

Dywedodd y Cynghorydd Ifan Davies ei fod yn poeni na fydd y fflamau yn cael eu diffodd yn fuan.

"Mae'n edrych yn debyg fydd y frigâd dân yma am rai dyddie eto," meddai.

"Fi'n credu fod pob un [diffoddwr tân] yng Ngheredigion mas yn ceisio rheoli'r sefyllfa."

Y fflamau yn y mynyddoedd yn ardal Ystrad Fflur dros nos

Ychwanegodd mai aros am law y maen nhw bellach.

"Debyg iawn bydd dim byd yn newid nawr tan fydd glaw yn dod dros y penwythnos fi'n credu - dydd Sul.

"Felly mae hi'n amser fishi a phryderus yn yr ardal."

Tu hwnt i Geredigion, roedd y tân gwair yma ar fynydd Dinas Baglan yng Nghastell-nedd Port Talbot dros nos

Hefyd yn siarad ar Dros Frecwast oedd y Cynghorydd Rhodri Davies, a ddywedodd bod y tân wedi gwaethygu nos Lun oherwydd bod y "gwynt wedi troi".

Does neb wedi gorfod gadael eu tai ar hyn o bryd, meddai'r Cynghorydd Davies, oherwydd bod y gwasanaethau brys "wedi bod yn llwyddiannus yn diffodd y tân rownd rhai o'r tai".

Dywedodd y Cynghorydd Davies bod "lot o ddifrod wedi cael ei wneud i fywyd gwyllt, ond mae pobl yr ardal yn saff ar hyn o bryd, sydd bwysicaf oll".