Bale wedi bod yn rhan o ymgais i brynu Clwb Pêl-droed Caerdydd

Roedd cyn-gapten Cymru Gareth Bale yn rhan o ymdrech i brynu Clwb Pêl-droed Caerdydd

Fe lansiodd Gareth Bale ymdrech i brynu Clwb Pêl-droed Dinas Caerdydd fis diwethaf.

Y gred ydy bod cyn-gapten Cymru, sy'n wreiddiol o Gaerdydd, wedi bod yn rhan o grŵp a gysylltodd yn uniongyrchol â pherchennog yr Adar Gleision, Vincent Tan.

Cafodd cynnig ei wneud i gael cyfran reolaethol yn y clwb, ond cafodd hwnnw ei wrthod gan y dyn busnes o Malaysia.

Dydy Caerdydd - a ddisgynnodd i Adran Un y tymor diwethaf - ddim yn gwneud sylw ar yr adroddiadau, a ddaeth i'r amlwg brynhawn Gwener.

Roedd adroddiadau ynghylch y posibilrwydd o Bale yn symud i Gaerdydd fel chwaraewr yn ystod y cyfnod cyn Cwpan y Byd 2022, ond fe ddewisodd ymuno â chlwb LA FC yn yr Unol Daleithiau.

Roedd adroddiadau yn gynharach ym mis Mehefin fod Bale yn rhan o ymdrech gan gonsortiwm sydd o'r Unol Daleithiau i brynu Plymouth Argyle - clwb arall yn Adran Un.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.