Cwpan Rygbi'r Byd: Saith newid i'r tîm fydd yn wynebu Canada

Fe fydd Bethan Lewis yn gapten ar Gymru am y tro cyntaf ddydd Sadwrn

Mae rheolwr Cymru wedi gwneud saith newid i'r tîm fydd yn wynebu Canada yng Nghwpan Rygbi'r Byd ddydd Sadwrn.

Fe fydd y cyd-gapteiniaid Alex Callender a Kate Williams yn methu'r gêm oherwydd anaf, gyda Bethan Lewis i arwain y tîm yn Stadiwm Cymunedol Salford.

Dyma fydd y tro cyntaf i Lewis fod yn gapten ar Gymru, a hynny wrth iddi ennill cap rhif 60 i'w gwlad.

Fe gollodd Cymru o 38-8 yn erbyn Yr Alban yn eu gêm agoriadol yn y grŵp, tra bod Canada wedi ennill yn gyfforddus o 65-7 yn erbyn Fiji.

Mae'r canlyniadau hynny yn golygu ei bod hi'n debygol y bydd angen i Gymru drechu'r tîm sy'n ail ar restr detholion y byd os am sicrhau eu lle yn rownd yr wyth olaf.

Mae Sean Lynn wedi gwneud saith newid i'r 15 gychwynnodd yn erbyn Yr Alban - gan gynnwys chwe newid ymhlith y blaenwyr.

Mae tri o'r newidiadau hynny yn y rheng flaen, gyda Maisie Davies a Molly Reardon yn ymuno â Sisilia Tuipulotu.

Abbie Fleming fydd yn bartner i Gwen Crabb yn yr ail reng, tra bod Bryonie King a Georgia Evans wedi eu dewis yn y rheng ôl gyda Bethan Lewis.

Yr unig newid ymhlith yr olwyr yw bod Carys Cox wedi ei dewis fel canolwr ynghyd â Courtney Keight.

'Her enfawr'

Dywedodd Sean Lynn, prif hyfforddwr Cymru: "Ry'n ni wedi edrych yn galed arnon ni ein hunain ac mae sgyrsiau gonest iawn wedi digwydd – fel y gallwn berfformio hyd at orau ein gallu yn erbyn un o'r timau gorau yng nghamp y menywod.

"Mae Canada yn ail ar restr detholion y byd – ac yn naturiol felly maen nhw'n un o'r ffefrynnau i ennill Cwpan y Byd. Does dim amheuaeth y bydd eu hwynebu'n cynnig her enfawr i ni.

"Mae angen i ni ddod ag egni gwirioneddol i mewn i'n gêm a sicrhau balchder diamheuol yn y crys. Drwy'r wythnos ry'n ni wedi canolbwyntio ar ein perfformiad ni a'r hyn sydd angen i ni ei wneud i sicrhau perfformiad ddydd Sadwrn."

Y garfan yn llawn

Nel Metcalfe, Jasmine Joyce-Butchers, Carys Cox, Courtney Keight, Lisa Neumann, Lleucu George, Keira Bevan; Maisie Davies, Molly Reardon, Sisilia Tuipulotu, Abbie Fleming, Gwen Crabb, Bryonie King, Bethan Lewis (capten), Georgia Evans.

Eilyddion: Kelsey Jones, Gwenllian Pyrs, Jenni Scoble, Tilly Vucaj, Branwen Metcalfe, Seren Lockwood, Kayleigh Powell, Kerin Lake.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.