Wyth dyn yn gwadu 'rhyfel tir rhwng barbwyr'

O'r chwith i dde: Shahab Husseini, Sardam Ebrahimi, Omed PIrot, Bave Hamed

Mae wyth dyn wedi gwadu bod yn gysylltiedig ag anhrefn dreisgar yn Sir Caerffili fis diwethaf.

Clywodd gwrandawiad llys blaenorol bod yr achos yn ymwneud â "rhyfel tir rhwng barbwyr" yn ardal y Coed-duon.

Roedd yr helynt wedi dechrau ar Stryd Fawr y Coed-duon brynhawn Iau, 13 Chwefror, oherwydd anghytuno ynglŷn ag agor siop farbwr newydd yn Nhrecelyn gerllaw.

Yn Llys y Goron Caerdydd fore Llun, fe wnaeth Alan Karimi, 30, o Gaerdydd, Shahab Husseini, 24, o Bont-y-pŵl, Bave Hamed, 30, o'r Coed-duon, Krmanj Sadiq, 29, o Gaerdydd, Bryar Muradi, 28, o Oakdale, Omed Pirot, 29 o Bentwynmawr, Caerffili, Adnan Mohamad, 29, o Gaerdydd a Sardam Ebrahimi, 25, o Oakdale - bledio'n ddieuog i gyhuddiad o anrhefn dreisgar.

Fe gafodd yr wyth eu rhyddhau ar fechnïaeth amodol ac mae disgwyl achos llys ym mis Mawrth y flwyddyn nesaf.