Dyn wedi cael ei daro gan gar tra'n mynd â'i gi am dro - cwest

Cafwyd hyd i gorff Aaron Jones ar dir y capel lleol wedi iddo gael ei daro gan gar

Mae cwest wedi cael ei agor a'i ohirio i farwolaeth tad i ddau o Sir Gaerfyrddin a gafodd ei daro gan gar ddeuddydd cyn y Nadolig.

Bu farw Aaron Jones, 38, ar 23 Rhagfyr ar ôl cael ei daro gan gerbyd wrth iddo fynd â'i gi am dro yn Llanpumsaint.

Ni wnaeth gyrrwr y cerbyd stopio wedi'r digwyddiad.

Cafwyd hyd i gorff Mr Jones ar dir y capel lleol ac fe glywodd y cwest ei fod wedi marw yn y fan a'r lle.

Mae'r ymchwiliad i'r digwyddiad yn parhau.

Wrth agor y cwest i'w farwolaeth ddydd Mawrth, dywedodd swyddog y crwner Malcolm Thompson fod Aaron Jones yn mynd â'i gi am dro pan gafodd ei daro gan gar ger Capel y Bedyddwyr Capel Salem am 19:20 ar y noson dan sylw.

Daeth person lleol o hyd i gi Mr Jones, ac fe gysylltodd â gwraig Mr Jones.

Clywodd agoriad y cwest fod ei gorff wedi'i ddarganfod ar dir y capel a'i fod wedi marw yn y fan a'r lle.

Fe ddigwyddodd y gwrthdrawiad ar 23 Rhagfyr

Mae Heddlu Dyfed-Powys wedi arestio dyn 27 oed mewn cysylltiad â'r digwyddiad.

Mae'n cael ei amau o achosi marwolaeth trwy yrru'n beryglus, methu ag aros wedi gwrthdrawiad a methu â hysbysu'r heddlu am wrthdrawiad.

Mae'r llu hefyd wedi cadarnhau eu bod wedi dod i hyd i gerbyd roedden nhw'n credu oedd yn y gwrthdrawiad.

Mae'r dyn wedi cael ei ryddhau ar fechnïaeth gydag amodau tra bod swyddogion arbenigol yn parhau i ymchwilio.

Mae teyrngedau wedi'u gadael i Aaron Jones ger safle'r gwrthdrawiad

Ym mhentref Llanpumsaint, mae blodau wedi eu gosod ger safle'r gwrthdrawiad, wrth i'r pentref barhau i ddygymod â marwolaeth Mr Jones.

Dywedodd y cynghorydd Bryan Davies, fore wedi'r digwyddiad, fod y gymuned leol yn galaru.

"Mae'n rhaid i fi ddweud bod y bachgen hwn mor frwdfrydig yn y gymuned. Pawb yn ei 'nabod e," meddai.

"Roedd calon dag e i bawb ac amser i bawb, a dim digon galle fe 'neud dros bobl."

Fe wnaeth y crwner cynorthwyol Gareth Lewis fynegi ei gydymdeimlad diffuant â'r teulu ar "yr amser anodd hwn".