Gallai gwyliau ysgol amrywio gan nad ydy cynghorau'n cytuno

Gallai problemau godi i rieni gyda gofal plant a threfnu gwyliau wrth i gynghorau ar draws Cymru fethu â chytuno ar ddyddiadau tymhorau ysgol.

Mae 13 o gynghorau, gan gynnwys Caerdydd a Wrecsam, am i hanner tymor y gwanwyn 2027 ddechrau yn gynnar ym mis Chwefror, ond mae naw arall, gan gynnwys Abertawe a Chasnewydd, am iddo ddechrau wythnos yn ddiweddarach.

Os bydd hyn yn digwydd, fe allai teuluoedd sydd â phlant mewn ysgolion gwahanol gael plant adref ar adegau gwahanol.

Mae Cyngor Powys hefyd am i wyliau'r haf ddechrau ar 16 Gorffennaf 2027 - sydd ychydig ddyddiau ynghynt na'r awdurdodau eraill, ac yn dechrau cyn Sioe Frenhinol Cymru.

Yn ôl ymgynghoriad, gafodd ei gyhoeddi ddechrau mis Mawrth, mae Llywodraeth Cymru'n ystyried defnyddio ei phwerau i orfodi ysgolion i ddefnyddio'r un dyddiadau.

Beth ydy'r cynlluniau?

Os ydy pob awdurdod lleol yn cael y dyddiadau y maen nhw'n eu dewis, mi fyddai'r ysgolion yn yr awdurdodau lleol canlynol yn cael eu hanner tymor rhwng 8 a 12 Chwefror 2027, ac yn gorffen ar gyfer gwyliau'r Pasg ar 19 Mawrth:

• Ynys Môn

• Pen-y-bont ar Ogwr

• Caerdydd

• Ceredigion

• Conwy

• Sir Ddinbych

• Sir y Fflint

• Gwynedd

• Merthyr Tudful

• Powys

• Rhondda Cynon Taf

• Bro Morgannwg

• Wrecsam

Yn y cyfamser, mi fyddai ysgolion yn yr awdurdodau isod yn cael eu hanner tymor rhwng 15 ac 19 Chwefror, gyda gwyliau'r Pasg yn dechrau ar 25 Mawrth:

• Blaenau Gwent

• Caerffili

• Sir Gaerfyrddin

• Sir Fynwy

• Castell-nedd Port Talbot

• Casnewydd

• Sir Benfro

• Abertawe

• Torfaen

Mae'r ddogfen ymgynghori gan y llywodraeth yn nodi: "Ar ôl ystyried yr holl wybodaeth, mae gweinidogion Cymru yn bwriadu cyhoeddi'r cyfarwyddyd yn amodol ar ganlyniadau'r ymgynghoriad hwn."

Mae Llywodraeth Cymru wedi cynnig safoni'r dyddiadau yn unol â'r grŵp sydd â mwy o ysgolion ynddo.

Felly, byddai hanner tymor Chwefror rhwng 8 a 12 Chwefror 2027, a gwyliau'r Pasg yn dechrau ar 19 Mawrth 2027.

Ond, mi fyddai'r llywodraeth yn caniatau i Gyngor Powys wneud trenfiadau i ddechrau eu gwyliau'r haf yn gynt er mwyn "adlewyrchu parch mawr gweinidogion Cymru at werth diwylliannol ac economaidd sylweddol Sioe Frenhinol Cymru".

Aeth y ddogfen ymlaen i ddweud eu bod yn credu y bydd dyddiadau cyson "o fudd i'r sector twristiaeth" a bod "yr hanfodion polisi hynny yn gorbwyso'r awydd i gael gwyliau gwahanol yn y gwanwyn, gan ystyried y rhesymau a roddwyd gan yr awdurdodau lleol".

Mae modd ymateb i'r ymgynghoriad tan 25 Mai 2025.