Gething yn ad-drefnu ei lywodraeth wedi ymddiswyddiadau

Mae'r Prif Weinidog Vaughan Gething wedi ad-drefnu cabinet Llywodraeth Cymru.

Daw'r ad-drefnu ar ôl i bedwar aelod blaenllaw o'i gabinet ymddiswyddo fore Mawrth.

Yn sgil hynny dywedodd Mr Gething y bydd yn ymddiswyddo.

Eluned Morgan sy'n gyfrifol am y Gymraeg.

Mae Jack Sargeant wedi cael ei wneud yn weinidog partneriaeth gymdeithasol, tra bod Sarah Murphy yn symud i fod yn gyfrifol am iechyd meddwl a blynyddoedd cynnar.

Bydd Ken Skates yn dod yn ysgrifennydd economi, tra bod Jayne Bryant yn cael ei dyrchafu’n ysgrifennydd dros lywodraeth leol.

Y pedwar aelod o'r llywodraeth a ymddiswyddodd fore Mawrth - Jeremy Miles, Julie James, Mick Antoniw a Lesley Griffiths

Y pedwar aelod a gyhoeddodd ddydd Mawrth eu bod yn gadael y llywodraeth oedd Julie James, Lesley Griffiths, Jeremy Miles a'r Cwnsler Cyffredinol Mick Antoniw.

Cyhoeddodd Mr Gething ddydd Mawrth y byddai'n "dechrau'r broses o gamu i lawr" fel arweinydd Llafur Cymru a Llywodraeth Cymru.

Does dim manylion hyd yma am y ras i'w olynu.

Mae BBC Cymru'n deall fod Jeremy Miles - y dyn a ddaeth yn ail o drwch blewyn i Mr Gething yn yr ornest ychydig fisoedd yn ôl - yn debygol o ymgeisio am arweinyddiaeth Llafur Cymru unwaith eto.

Ond mae un o'r enwau sydd wedi eu crybwyll, y cwnsler cyffredinol Mick Antoniw, wedi cadarnhau nad yw'n bwriadu ymuno â'r ras.

Y llywodraeth yn llawn

• Ysgrifennydd Cyllid, y Cyfansoddiad a Swyddfa’r Cabinet - Rebecca Evans

• Ysgrifennydd Newid Hinsawdd a Materion Gwledig - Huw Irranca-Davies

• Ysgrifennydd Addysg - Lynne Neagle

• Ysgrifennydd Llywodraeth Leol a Thai - Jayne Bryant

• Ysgrifennydd Iechyd, Gofal Cymdeithasol a’r Gymraeg - Eluned Morgan

• Ysgrifennydd Economi, Trafnidiaeth a Gogledd Cymru - Ken Skates

• Ysgrifennydd Diwylliant, Cyfiawnder Cymdeithasol, Trefnydd a’r Prif Chwip - Jane Hutt

• Gweinidog Gofal Cymdeithasol - Dawn Bowden

• Gweinidog Partneriaeth Gymdeithasol - Jack Sargeant

• Gweinidog Iechyd Meddwl a’r Blynyddoedd Cynnar - Sarah Murphy