Carcharu dyn am yrru 100mya ar ffordd 20mya yn y gogledd

Cafodd Dale Broome ddedfryd o 16 mis yn y carchar yn Llys y Goron Caernarfon

Mae dyn wedi ei anfon i garchar ar ôl gyrru 100mya ar ffordd 20mya yn y gogledd, tra bod ganddo ddwywaith y lefel gyfreithiol o alcohol yn ei waed.

Cafodd Dale Broome, 29 oed o Wolverhampton, ei arestio ar 10 Rhagfyr yn dilyn adroddiadau bod person yn gyrru'n beryglus ar yr A55 ger Abergele.

Wrth gael ei erlid gan swyddogion o uned troseddau gyrru Heddlu'r Gogledd, bu Broome yn gyrru dros y terfyn cyflymder, gan gynnwys 100mya ar ffordd 20mya.

Cafodd ei arestio ar ôl mynd yn sownd mewn mwd ar lôn wledig.

Cafodd Broome ei arestio a'i gyhuddo'n ddiweddarach o yfed a gyrru a throseddau eraill, gan gynnwys gyrru tra'r oedd wedi ei wahardd rhag gwneud hynny, peidio stopio, gyrru'n beryglus a gyrru heb yswiriant.

Yn Llys y Goron Caernarfon, cafodd ddedfryd o 16 mis yn y carchar.

Cafodd hefyd ei wahardd rhag gyrru am bedair blynedd ac wyth mis.

Roedd lefel yr alcohol yng ngwaed Aaron Kerr ymhlith yr uchaf sydd erioed wedi ei gofnodi gan Heddlu'r Gogledd

Yn y cyfamser, cafodd dyn o Ynys Môn ei ddedfrydu i 18 wythnos yn y carchar a'i wahardd rhag gyrru am chwe blynedd mewn llys yng Nghaernarfon, am yfed a gyrru.

Mae'n ymddangos bod lefel yr alcohol yng ngwaed Aaron Kerr, 27 oed o Gaergybi, ymhlith yr uchaf sydd erioed wedi ei gofnodi gan Heddlu'r Gogledd.

Roedd 358 miligram o alcohol mewn 100 miligram o waed. Y lefel cyfreithlon er mwyn gyrru ydi 80 miligram o alcohol.

Cafodd Kerr ei arestio ger Llanfaelog ym mis Gorffennaf 2024.

Mewn mis, mae Heddlu'r Gogledd wedi stopio bron i 200 o bobl oedd dan ddylanwad alcohol neu gyffuriau

Dywedodd Heddlu'r Gogledd eu bod nhw wedi stopio bron i 200 o bobl oedd dan ddylanwad alcohol neu gyffuriau mewn cyfnod o fis, fel rhan o ymgyrch i geisio atal gwrthdrawiadau angheuol a digwyddiadau peryglus ar y ffyrdd.

Rhwng 1 Rhagfyr 2024 a Chalan 2025, cafodd 66 o bobl eu harestio am yfed a gyrru, a 108 eu harestio am yrru o dan ddylanwad cyffuriau.

'Does unman i guddio'

Dywedodd y Sarjant Emma Birrell, oedd yn arwain yr ymgyrch: "Dydi ein gwaith ni ddim ar ben gan fod y Nadolig drosodd.

"Mae'n gwaith o gadw pobl yn ddiogel mewn ceir yn y gogledd yn parhau 24 awr y dydd, saith diwrnod yr wythnos, 365 o ddyddiau'r flwyddyn.

"Does unman i guddio."

Apeliodd hefyd ar y cyhoedd i'w helpu nhw wrth geisio delio â'r broblem.

"Os ydych chi'n nabod rhywun neu'n amau bod rhywun yn yfed a gyrru neu'n cymryd cyffuriau a gyrru, gadewch i ni wybod," meddai.

"Mae'n siomedig iawn fod gormod o bobl yn dal i roi eu bywydau nhw ac eraill mewn peryg ac rydyn ni'n parhau i weithio'n galed i dynnu'r bobl hynny oddi ar y ffyrdd".