Creu campfa ar fferm i roi hwb i'r corff a'r enaid

Mae ffermwr wedi creu campfa ar fferm yng nghanol cefn gwlad y gogledd, gyda'r gobaith o roi hwb i'r corff a’r enaid i bobl yr ardal.

Mae Robin Jones wedi creu ei gampfa ar Fferm Pen y Garth ger Yr Wyddgrug.

Drwy gyplysu defnyddio offer fferm ac offer ymarfer modern, mae campfa Farm Fit wedi dod yn hynod boblogaidd.

Erbyn hyn mae dros 80 o bobl o bob oed yn ymarfer yno’r gyson, ac maen nhw hefyd yn darparu cymorth i blant sydd ag anghenion arbennig ac awtistiaeth.

Mae campfa Farm Fit wedi'i lleoli ar Fferm Pen y Garth ger Yr Wyddgrug

O neidio dros fêls gwair i godi hen olwynion tractor, mae offer a deunyddiau traddodiadol Fferm Pen y Garth yn cael bywyd newydd, a hynny i gadw pobl yn ffit ac yn iach.

Dechreuodd y cwbl mewn sied wair, ond ers hynny mae pethau wedi datblygu a datblygu, gan gyfuno offer modern gyda phob math o greiriau eraill.

Ond i'r dyn a greodd y cwbl - Robin Jones, sy’n hyfforddwr personol ac yn ffermio - mae o’n fwy na chadw’n heini.

Mae iechyd meddwl pobl yr un mor bwysig ag iechyd corfforol, meddai.

Mae'r gampfa yn cyfuno offer modern gydag eitemau fyddai'n cael eu darganfod ar fferm draddodiadol

"Dwi wir yn casáu galw fo'n gym a bod yn onest - un o’r prif bethau ydy creu cymdeithas.

"'Da ni’n cael barbeciws, 'da ni’n mynd am dro - jyst ceisio gwneud cymaint efo’n gilydd pryd 'da ni’n gweithio allan.

"Dim ar ben dy hun efo headphones ar - 'da ni’n trio cymysgu, cael pobl at ei gilydd, sydd mor anodd i ddod ar ei draws yn yr oes yma, i fod yn onest."

Dywed Robin Jones mai creu cymdeithas o bobl yw un o brif nodau'r gampfa

Daw pobl o bell ac agos i'r gampfa, ac yn amlwg maen nhw wrth eu boddau.

Dywedodd Dafydd Williams ei fod yn mynd yno oherwydd "yr hwyl a phopeth arall".

"Yn fwy na dim, mae 'na griw da ohonom ni - mwy o gymdeithas na jyst mynd i’r gym ar dy ben dy hun."

Ychwanegodd Helen Waring: "Pob nos Lun a nos Fercher 'da ni’n cael workout go iawn efo Robin.

"Mae 'na hwyl ac mae 'na gymuned hyfryd yma. Mae Robin yn gymeriad a hanner!"

Mae Helen Waring ac Anna Jones yn canmol y gymuned yn Farm Fit

Dywedodd Anna Jones fod y lle yn "lot o hwyl ac mae Robin wastad yn rili positif ac yn annog ni wastad i jyst trio ein gorau".

"Mae'n ffordd hwyl o gadw’n ffit a gweld pawb hefyd."

Mae holl elw’r gampfa yn mynd yn ôl i’r gymuned, a’r gobaith ydy ehangu’r ddarpariaeth yn Fferm Pen y Garth dros y blynyddoedd nesaf i gynnig mwy o adnoddau eto fel bod mwy o bobl o bob oed yn elwa.