Dod yn bencampwr seiclo ar ôl cael canser a sepsis

Mi ddaeth Sam Woodward i’r brig mewn cystadleuaeth yn Llandrindod a chael ei goroni’n bencampwr Cymru

Ddeunaw mis ers goroesi math prin o ganser, mae dyn ifanc o Wynedd wedi disgrifio'r profiad o gael ei goroni'n bencampwr seiclo Cymru fel un "hollol amazing".

Bu'n rhaid i Sam Woodward, 19 o Waunfawr, ddysgu sut i gerdded eto ar ôl cael llawdriniaeth fawr ar ei goes yn 2023.

Ond gyda chefnogaeth ei glwb seiclo, mae o'n gobeithio cael digon o noddwyr i droi'n broffesiynol.

Mi ddaeth Sam i’r brig mewn cystadleuaeth yn Llandrindod fis yma a chael ei goroni’n bencampwr Cymru.

Mi ddechreuodd seiclo ar hyd lonydd ei fro ar ôl ymuno â chlwb beicio Egni Eryri rai blynyddoedd yn ôl.

Cafodd Sam lawdriniaeth am fath o ganser ar ei goes 18 mis yn ôl

Dywedodd: “Nes i orffen job fi fel saer coed i concentratio mwy ar seiclo ac ers hynna dwi di cael lle ar Dîm PB Performance a rili wedi gallu focusio ar seiclo lot mwy.

“Ma di galluogi i fi rasio lot mwy a rhoi lot o siawns da imi ddangos fy hun.”

Wrth ddod at y llinell derfyn fe lwyddodd i arwain y grŵp o dros 500 metr gan groesi'n gyntaf.

“Oedd o’n amazing... dwi di bod yn dreamio am hwnna ers blwyddyn rŵan."

“Dwi jest yn lyfio rasio, reidio beic fi... y rhyddid ohono a da chi rili gorfod bod reit cryf i fynd allan bob dydd am rhyw ddwy neu bump awr yn y gaeaf”.

Mi ddaw llwyddiant Sam ddeunaw mis yn unig ar ôl derbyn llawdriniaeth am fath o ganser - leiomyosarcoma - a dyfodd ar ei goes.

Eglurodd: “Nath hynna roi fi allan am ychydig o fisoedd ond ar ôl dau operation nes i hefyd gal sepsis ar ôl hynna, ac oedd hynna yn awful”.

Wedi llawdriniaethau a ffisiotherapi, mi ddechreuodd fynd yn ôl ar ei feic ond eglurodd fod hynny'n "rili tough”.

“Nes i orfod dysgu sut i gerdded eto a wedyn reidio beic am hwyl”.

Dywedodd Alun Williams o glwb beicio Egni Eryri bod y tîm yn falch iawn o lwyddiant Sam

Wrth gryfhau, fe dderbyniodd gefnogaeth gan ei glwb lleol yn Eryri.

Mae clwb Egni Eryri wedi cael llwyddiant arall eleni wrth i un o aelodau eraill y clwb, Gareth McGuiness gael ei goroni’n bencampwr byd yn y UCI Gran Fondo, gan guro 250 o gystadleuwyr eraill.

Yn ôl un o’r selogion, Alun Williams mae’r tîm yn falch iawn o lwyddiant y ddau.

“Mae beth mae Sam wedi neud eleni ‘di bod yn dda iawn ar ôl bod efo’i salwch," meddai.

“Ti'n gorfod tynnu dy gap iddo bod o wedi bod mor llwyddiannus."

Mae Osian Evans yn aelod o glwb beicio Egni Eryri

Ategu hynny wnaeth Osian Evans, 24 sydd hefyd yn seiclo gyda’r clwb.

“Ma’n amazing, mae jest yn neis i bobl cael gweld pa mor galed mae pobl yn gweithio yn y clwb a bod ni’n cael llwyddiant allan ohono”.

Sam Woodward gydag aelodau eraill o glwb Egni Eryri

Gobaith Sam ydi ceisio cael digon o noddwyr iddo fedru troi'n broffesiynol.

“Mae gennai lot o goals at flwyddyn nesaf, jest cario mlaen i progressio a cario mlaen i joio”, meddai Sam.

“Dwi’n 100% committed.”