Storm Bert: Achub 10 wedi tirlithriad a miloedd heb drydan

Bu'n rhaid achub pum oedolyn a phum plentyn o dŷ wedi tirlithriad yn Sir Wrecsam wrth i Storm Bert achosi trafferthion ar hyd Cymru.

Mae'r heddlu wedi cau'r ardal o gwmpas y tirlithriad, a ddigwyddodd tua 14:00 yn Llanarmon Dyffryn Ceiriog, ger Llangollen.

Roedd tua 2,500 o adeiladau yn ne a gorllewin Cymru heb gyflenwad trydan yn gynharach oherwydd y tywydd garw.

Yn ôl y National Grid, roedd dros 1,000 o'r cyfeiriadau heb drydan brynhawn Sadwrn yn Sir Castell-nedd Port Talbot, dros 600 yn Sir Gaerfyrddin, dros 250 yn siroedd Caerffili a Mynwy a bron i 200 ym Mhowys.

Erbyn 20:30 nos Sadwrn roedd y nifer wedi gostwng i lai na 600.

Mae ambell ffordd ar gau oherwydd y glaw trwm ac mae sawl rhybudd llifogydd mewn grym.

Ymateb y gymuned yn 'anhygoel'

Dywedodd llefarydd ar ran Gwasanaeth Tân ac Achub Gogledd Cymru eu bod wedi anfon criwiau o Wrecsam, Johnstown, Llangollen a Rhuthun mewn ymateb i'r tirlithriad.

Roedd dŵr a malurion wedi llifo o dir uchel i'r tŷ, meddai, gan achosi "difrod sylweddol" i'r eiddo.

Ychwanegodd y gwasanaeth bod "llifogydd sylweddol yn parhau yn yr ardal" gan gynghori'r cyhoedd i gadw golwg ar y wybodaeth ddiweddaraf ac osgoi unrhyw ffyrdd sydd ar gau.

Yn ôl perchennog tafarn leol, roedd y gwasanaethau brys wedi gadael y safle erbyn diwedd y prynhawn.

"Mae'r gymuned wedi bod yn anhygoel," dywedodd Jonathan Greatorex wrth BBC Cymru, "ac wedi dod at ei gilydd i gefnogi'r teulu ar adeg hynod anodd, mwya' tebyg."

Tonnau'r taro'r arfordir ym Mhorthcawl

Roedd disgwyl toriadau trydan a thrafferthion eraill tra bod dau rybudd melyn am dywydd garw mewn grym yng Nghymru ddydd Sadwrn.

Mae rhybudd melyn am law trwm mewn grym ym mhob un o siroedd Cymru ers 06:00, gan barhau tan 06:00 ddydd Sul ac fy rybuddiodd y Swyddfa Dywydd bod hyd at 150mm o law yn bosib mewn rhannau o Gymru ddydd Sadwrn.

Mae rhybudd ar wahân am wyntoedd cryf iawn "sy'n debygol o achosi amodau arfordirol peryglus a thrafferthion" yn 13 o siroedd rhwng bore Sadwrn a 21:00 nos Sul.

Mae'r rhybudd hwn yn effeithio ar lefydd yn siroedd Abertawe, Bro Morgannwg, Caerdydd, Sir Gaerfyrddin, Castell-nedd Port Talbot, Ceredigion, Conwy, Gwynedd, Penfro, Pen-y-bont ar Ogwr, Powys, Rhondda Cynon Taf ac Ynys Môn.

Dywedodd y Swyddfa Dywydd bod maint y glaw all syrthio yn y de ddydd Sadwrn yn gyfystyr â chyfanswm glawiad cyfartalog mis Tachwedd i gyd.

Roedd disgwyl hyrddiadau rhwng 50-60 mya yn y rhan fwyaf o ardaloedd sy'n cael eu heffeithio gan y rhybydd gwynt, a rhwng 60-70 mya mewn rhai mannau arfordirol.

Bu'n rhaid cau rhan o'r A5 yn ardal Capel Curig oherwydd y dŵr ar y ffordd

Yn ôl y Swyddfa Dywydd fe gafodd hyrddiadau o 82 mya eu cofnodi yng Nghapel Curig, yn Sir Conwy ac mae rhan o'r A5 ar gau rhwng Capel Curig a Bethesda gan fod gymaint o ddŵr arni.

Erbyn diwedd y prynhawn roedd yr A494 yn Llanuwchllyn ger Y Bala ar gau hefyd, ynghyd â lôn orllewinol ffordd osgoi Dolgellau (A470).

Mae llifogydd yn creu anawsterau mewn rhannau eraill o'r A5 - ger Llidiart y Parc rhwng Corwen a Charrog a rhwng Maerdy a Cherrigydrudion.

Bu'n rhaid cau'r M48 Pont Hafren oherwydd gwyntoedd cryfion, gan olygu bod angen i yrwyr ddefnyddio Pont Tywysog Cymru yn hytrach.

Yn y gogledd mae cyfyngiadau ar yr A55 Pont Britannia, a does dim modd gyrru carafanau, beiciau modur na beiciau ar ei thraws am y tro.

Mae ffordd ar gau ym mhentref Clun ger Castell-nedd wedi i bostyn lamp syrthio ger pont rheilffordd.

Dywed Heddlu De Cymru bod y ffordd yn debygol o fod ar gau "am beth amser" wrth i arbenigwyr ddiogelu'r ardal.

Roedd disgwyl y byddai'r tywydd gwael yn achosi trafferthion teithio dros y penwythnos.

Bu'n rhaid canslo holl deithiau Irish Ferries rhwng Doc Penfro a Rosslare ddydd Sadwrn, ynghyd â rhai o deithiau'r cwmni rhwng Caergybi a Dulyn.

Mae Stena Line hefyd wedi canslo gwasanaethau'r dydd rhwng Abergwaun a Rosslare.

Dywedodd Gwylwyr y Glannau Caergybi ganol ddydd Sadwrn bod wyth o gychod wedi gorfod angori oddi ar yr arfordir yn ardal Amlwch oherwydd yr amodau garw.

Ffordd dan ddŵr ym mhentref Mynachlog-ddu, Sir Benfro fore Sadwrn

Fe gadarnhaodd Trafnidiaeth Cymru ddydd Gwener mai bysus fydd yn rhedeg yn hytrach na threnau ddydd Sadwrn ar hyd Rheilffordd Dyffryn Conwy a Rheilffordd Lein Calon Cymru yn y canolbarth oherwydd y storm sydd i ddod.

Roedd disgwyl i wasanaethau eraill redeg yn ôl yr arfer ond mae rheolwyr yn cynghori pobl i wirio'r manylion diweddaraf ac i gymryd pwyll wrth deithio i'r orsaf.

Fe gododd lefel Afon Colwyn sy'n llifo trwy Feddgelert wedi'r glaw

Mae Cyfoeth Naturiol Cymru yn rhybuddio'r cyhoedd i fod yn wyliadwrus rhag llifogydd.

Wrth i law trwm syrthio ac eira ganol yr wythnos doddi, fe allai ddŵr cronni mewn mannau a lefelau afonydd godi'n sydyn.

Dywed CNC bod eu timau'n cydweithio ag ymatebwyr brys eraill ac awdurdodau lleol "gan sicrhau bod amddiffynfeydd llifogydd mewn cyflwr da a pharatoi i helpu cadw pobl ac eiddo yn ddiogel".

Mae nifer y rhybuddion llifogydd ar draws Cymru wedi codi'n gyson yn ystod y dydd.

Mae'r rhybuddion mwyaf difrifol yn ardaloedd canlynol:

• Afon Llwchwr yn Rhydaman a Llandybie;

• Ardaloedd isel ar bwys Afon Cothi;

• O gwmpas sawl eiddo ynysig ger Afon Tywi rhwng Llandeilo ac Abergwili;

• Afon Hafren yn ardaloedd Aber-miwl a Fron, ac Aberbechan; ac

• Afon Tawe yn Ystradgynlais.

Mae'r manylion diweddaraf yma.

Cerbydau'n cael eu gyrru'n araf ar ffordd ger Llangwm, Sir Conwy gan fod gymaint o ddŵr arni

Dywedodd y Rheolwr Tactegol, Katie Davies bod "sicrhau eich bod yn gwybod beth yw'r sefyllfa ble rydych yn byw yn wirioneddol bwysig....

"Bydd ein timau'n gwneud popeth posib i leihau'r risg i'n cymunedau, ond os oes llifogydd rydym eisiau gwneud yn siŵr bod pobl yn gwneud popeth gallen nhw ei wneud i gadw eu hunain yn ddiogel hefyd.

"Rydym yn erfyn ar bobl i gadw draw o afonydd sydd wedi codi, i beidio gyrru neu cerdded drwy lifogydd - yn aml mae'n ddyfnach nag y mae'n edrych ac fe allai guddio peryglon cudd."