'Digwyddiad hynod brin': Dolffiniaid trwyn potel yn lladd llo yn y de

Roedd posib gweld y digwyddiad o lan Bae Ceredigion, meddai'r Seawatch Foundation

Mewn digwyddiad sydd wedi'i ddisgrifio fel un "hynod brin", cafodd llo dolffin cyffredin ei ladd yng Ngheinewydd ddydd Iau, gan bedwar dolffin trwyn potel.

Cafodd y Seawatch Foundation, sy'n gofalu am ddolffiniaid yn yr ardal, eu galw i ymchwilio i'r digwyddiad am 18:10.

Roedd posib gweld y digwyddiad o lan Bae Ceredigion, meddai'r sefydliad, a chafodd y llo ei lwytho ar y cwch i wneud awtopsi - i weld pam gafodd y llo ei adael ar ei ben ei hun yn y dŵr.

Gwelodd teithwyr ar gwch preifat yr hyn yr oeddent yn ei feddwl, i ddechrau, oedd dolffiniaid trwyn potel yn ymosod ar lamhidydd harbwr yn fwriadol - rhywbeth sy'n digwydd o dro i dro.

Nid yw'n glir pam fod dolffiniaid yn ymosod ar lamhidyddion ond dywedodd arbenigwyr y gallai fod yn ymateb i gystadleuaeth am fwyd neu ymddygiad rhywiol wedi'i gamgyfeirio.

Roedd y cwch, sy'n eiddo i Dolphin Spotting Boat Trips, yn cludo 12 o deithwyr ar daith breifat i weld dolffiniaid.

Un o'r teithwyr ar y cwch oedd Holly Williams, 35, a dywedodd hi fod y dolffiniaid wedi dechrau "neidio allan o'r dŵr".

"Roedden ni'n meddwl mai dim ond chwarae oedden nhw," meddai.

Gwelodd y grŵp rywbeth yn cael ei daflu allan o'r dŵr gan y dolffiniaid ac ar y dechrau roedden nhw'n meddwl mai eog oedd yno - cyn sylweddoli mai llo dolffin cyffredin oedd y creadur.