Achub pum dolffin aeth yn sownd ar draeth ar Ynys Môn

Cafodd chwech o ddolffiniaid eu canfod ar draeth ar Ynys Môn fore Mercher

Mae pum dolffin wedi cael eu hachub a'u dychwelyd i'r môr ar ôl iddyn nhw fynd yn sownd ar draeth ar Ynys Môn.

Cafodd y dolffiniaid eu canfod fore Mercher ar draeth ger Y Fali ger Caergybi, ac fe lwyddodd achubwyr i'w rhoi yn ôl yn y dŵr wrth i'r llanw ddod i mewn.

Dywedodd corff y British Divers Marine Life Rescue (BDMLR) bod gwirfoddolwyr wedi llwyddo i gyfeirio mwyafrif yr haid yn ôl i'r môr.

Ond fe gafodd corff un dolffin ei ganfod yn farw ar y lan y bore canlynol.

Mae dolffiniaid yn medru goroesi allan o'r dŵr am tua 12 awr, ond mae pwysau eu cyrff ar y tir yn golygu bod pwysedd yn gallu atal ocsigen rhag cyrraedd eu horganau, a gall hynny fod yn angheuol.

Fe wnaeth y BDLMR yrru tîm o wirfoddolwyr sy'n arbenigwyr ar famaliaid morol er mwyn rhoi cymorth cyntaf i'r dolffiniaid.

Mae dolffiniaid yn medru anadlu yn yr awyr agored, ond mae'n anodd iddyn nhw oroesi allan o'r dŵr

Gyda help gan wirfoddolwyr eraill ac o ganolfan yr Awyrlu yn Y Fali, fe wylion nhw'r pedwar dolffin cyntaf yn ceisio nofio yn ôl i'r môr ar y llanw.

Ond wrth i'r môr gilio roedd y tîm yn bryderus y gallen nhw fynd yn sownd eto.

Aeth aelodau meddygol y criw i'r môr i gynorthwyo, gan gyfeirio'r dolffiniaid tuag at ddŵr agored, ac fe lwyddodd yr anifeiliaid i gyrraedd yno yn y diwedd.

Ychwanegodd y BDLMR fod un o ddau ddolffin a ddiflannodd wrth i'r llanw godi wedi cael ei ganfod yn farw, ac fe fydd archwiliad post mortem yn cael ei gynnal gan arbenigwyr.