'Rhai ardaloedd angen mwy o fewnfudo' - Rhun ap Iorwerth

Yn ôl Rhun ap Iorwerth, Llywodraeth y DU sydd ar fai bod gwasanaethau cyhoeddus dan straen - nid mewnfudwyr

Mae rhai ardaloedd yng Nghymru angen mwy, nid llai, o fewnfudo yn ôl arweinydd Plaid Cymru.

Dywedodd Rhun ap Iorwerth mewn cyfweliad â BBC Cymru fod angen "mwy o fewnfudwyr mewn rhai mannau".

Yn 2023 fe wnaeth tua 685,000 o bobl fewnfudo'n gyfreithlon i'r DU, ond mae Ysgrifennydd Cymru David TC Davies wedi dweud ei fod eisiau gweld y ffigwr yn gostwng i 100,000-150,000.

Ond yn ôl Mr ap Iorwerth, Llywodraeth y DU sydd ar fai bod gwasanaethau cyhoeddus dan straen - nid mewnfudwyr.

Dywedodd arweinydd Plaid Cymru ei fod yn cymryd "pryderon gwirioneddol" pobl am nifer y mewnfudwyr i'r DU "yn ddifrifol iawn".

"Dylwn ni gymryd sylw o bryderon pobl y gallai mewnfudo roi pwysau ar wasanaethau cyhoeddus," meddai Mr ap Iorwerth.

Ond dywedodd fod y pwysau ar wasanaethau cyhoeddus yn "deillio o ddiffyg gwariant cyhoeddus gan Lywodraeth y DU."

"Byddai un blaid yn dweud ei fod [mewnfudo] yn rhoi pwysau ar ysgolion... ond y broblem sydd gennym ni gydag ysgolion lle rwy'n byw ydy diffyg disgyblion.

"Mae diboblogi yn un o'r materion mwyaf sy'n ein hwynebu ni."

'Angen mwy o bobl mewn rhai meysydd'

Dywedodd fod angen i geiswyr lloches "gael eu prosesu yn gywir", ac y dylai'r rheiny sydd ddim yn cyrraedd y trothwy gael eu gyrru adref "os yn ddiogel".

"Mae angen i ni gydnabod sut dy'n ni'n cael mwy o bobl i rai meysydd yn yr economi, fel iechyd a gofal," meddai.

"'Mae mewnfudo yn ddrwg' yn bennawd y mae rhai pobl mewn gwleidyddiaeth - pobl sydd eisiau cymryd mantais - eisiau i chi ddarllen."

Bydd ymgyrchu dros annibyniaeth yn cael ei roi o'r neilltu dros gyfnod yr etholiad, medd Rhun ap Iorwerth

Dywedodd Mr ap Iorwerth hefyd y bydd ymgyrchu dros annibyniaeth yn cael ei roi o'r neilltu am y tro wrth i'r blaid ganolbwyntio ar yr etholiad cyffredinol.

Dywedodd Rhun ap Iorwerth mewn cyfweliad â BBC Cymru mai "nid etholiad annibyniaeth ydy hwn".

Dyw maniffesto Plaid Cymru ddim yn mynd i fanylder am annibyniaeth tan dudalen 42, ac nid yw'n gosod targed o ran dyddiad i gael refferendwm, yn wahanol i rai o faniffestos blaenorol y blaid.

Ond dywedodd Mr ap Iorwerth mai cael Cymru annibynnol yw'r "wobr ar ddiwedd y dydd", a'i fod "wastad wedi credu hynny".

"Rydyn ni'n siarad am nawr, a sut y gallwn ni adeiladu economi gryfach, ffyniannus i Gymru," meddai.

'Popeth yn ymwneud ag annibyniaeth'

Yn ymateb i sylw ymgeisydd Plaid Cymru, Ann Davies ar BBC Radio Wales fore Llun nad ydy annibyniaeth yn fater sy'n cael ei grybwyll ar stepen y drws, dywedodd Mr ap Iorwerth fod pob pwnc yn ymwneud â Chymru annibynnol.

"Yr hyn sy'n bwysig i bobl - iechyd, addysg, yr economi - mae'r rheiny oll yn bendant am annibyniaeth," meddai.

"Mae traean o bobl yn dweud wrth arolygon barn yn gyson y byddai ganddyn nhw ddiddordeb mewn cael Cymru annibynnol".

Dywedodd mai nod Plaid Cymru ydy ennyn mwy o ddiddordeb yn y pwnc er mwyn "adeiladu tuag at" Gymru annibynnol.

Roedd Rhun ap Iorwerth yn cael ei holi gan gyflwynydd BBC Cymru, Nick Servini

Bydd cyfweliad llawn Rhun ap Iorwerth yn cael ei ddarlledu ar BBC One Wales am 19:00 nos Lun. Gallwch wylio ar-lein yma.

Y cyfweliad gydag arweinydd Plaid Cymru yw'r olaf yn nghyfres cyfweliadau cyflwynydd BBC Cymru, Nick Servini, gydag aelodau blaenllaw y prif bleidiau cyn yr etholiad.

Gallwch wylio'r cyfweliadau gyda Nick Thomas-Symonds Llafur, David TC Davies o'r Ceidwadwyr, a chynrychiolwyr o'r Democratiaid Rhyddfrydol a Reform UK, ar wefan y BBC.