Dyn yn y llys wedi digwyddiad y tu allan i orsaf heddlu

Alexander Stephen Dighton yn cyrraedd y llys ddydd Llun

Mae dyn 27 oed wedi ymddangos yn y llys mewn cysylltiad â digwyddiad y tu allan i orsaf heddlu yn Nhonysguboriau nos Wener.

Mae Alexander Stephen Dighton o Lantrisant yn wynebu saith cyhuddiad i gyd - gan gynnwys ceisio llofruddio ac ymosod ar weithiwr brys.

Mewn gwrandawiad byr yn Llys Ynadon Merthyr Tudful ddydd Llun fe wnaeth Mr Dighton - sydd wedi dewis cynrychioli ei hun - gadarnhau ei enw a'i ddyddiad geni.

Mae hefyd wedi ei gyhuddo o ymosod, cynnau tân yn fwriadol, achosi difrod troseddol, bod ag arf ymosodol yn ei feddiant a bod ag arf llafnog yn ei feddiant.

Swyddogion heddlu'n ymchwilio tu allan i orsaf heddlu Tonysguboriau ddydd Sadwrn

Mae'r achos yn ymwneud â digwyddiad y tu allan i orsaf heddlu yn Nhonysguboriau am tua 19:00 nos Wener, 31 Ionawr.

Fe wnaeth swyddogion ymateb yn dilyn adroddiadau bod rhywun yn difrodi cerbydau heddlu ac yn "achosi aflonyddwch".

Cafodd tri swyddog heddlu eu hanafu, a bu'n rhaid i ddau gael triniaeth ysbyty wedi'r digwyddiad.

Mae'r ddau bellach wedi cael eu rhyddhau o'r ysbyty.

Gan fod natur y cyhuddiadau mor ddifrifol, cafodd yr achos ei gyfeirio at Llys y Goron.

Fe fydd Mr Dighton yn cael ei gadw yn y ddalfa ac mae disgwyl i'r gwrandawiad nesaf gael ei gynnal yn Llys y Goron Caerdydd ar 3 Mawrth.