Adeiladwr o Geredigion yn cael dirwy am beidio â thrin asbestos yn gywir

Mewn gwrandawiad dedfrydu ar 14 Mai 2025, cafodd Mr Ciminera ddirwy o £200 am bob un o'r ddwy drosedd

Mae adeiladwr o Geredigion a anwybyddodd fesurau diogelwch wrth drin asbestos wedi cael dirwy.

Fe blediodd Ashley Ciminera o Felin-fach yng Ngheredigion yn euog i ddau achos sy'n ymwneud â thrin gwastraff mewn modd sy'n debygol o achosi llygredd i'r amgylchedd neu niwed i iechyd pobl.

Pan fydd haenau asbestos yn cael eu tynnu, mae'n rhaid i'r unigolyn sy'n trin y deunydd wneud pob ymdrech i atal ffibrau asbestos rhag cael eu rhyddhau i'r awyr.

Fe gafodd ei ddedfrydu gan Ynadon yng Nghanolfan Gyfiawnder Aberystwyth a dirwy o £200 am bob un o'r ddwy drosedd gan gynnwys costau ychwanegol.

Ym mis Mehefin 2023 roedd Mr Ashley Ciminera, sy'n 37 oed, yn tynnu to i lawr yn Warws Teifi yn Aberteifi.

Fe ollyngodd haenau o'r to oedd yn rhychiog ac yn cynnwys asbestos i faes parcio oedd â mynediad cyhoeddus, ac oedd yn agos i'r palmant.

Wrth iddo dynnu haenau o'r to roedd darnau tameidiog wedi cwympo gan ddifrodi ceir a oedd wedi'u parcio islaw.

Pan yn trin cynnyrch sy'n cynnwys asbestos mae'n rhaid sicrhau ei fod yn cael ei dynnu heb ei dorri ac yna ei lapio mewn dwy haen o blastig trwm.

Y rheswm am hyn yw pan fydd deunyddiau sy'n cynnwys asbestos yn cael eu difrodi, gallant ryddhau ffibrau bach i'r awyr.

Mae siâp a maint ffibrau asbestos yn ei alluogi i dreiddio'n ddwfn i'r ysgyfaint, lle gall aros a threiddio i feinwe'r ysgyfaint.

Clywodd y gwrandawiad bod gadael asbestos wedi torri mewn man cyhoeddus agored felly yn broblem iechyd cyhoeddus difrifol.

'Rhybudd clir am gamreoli deunyddiau peryglus'

Dywedodd y Cynghorydd Matthew Vaux, Aelod Cabinet Ceredigion: "Mae'r achos hwn yn dangos y bydd unrhyw un a ganfyddir yn euog o gam-drin gwastraff peryglus yn wynebu cosbau llym.

"Mae'r erlyniad hwn yn rhybudd clir i bob unigolyn a sefydliad na fydd camreoli deunyddiau peryglus yn ddiofal neu'n fwriadol yn cael ei oddef."

Mewn gwrandawiad dedfrydu ar 14 Mai 2025, cafodd Mr Ciminera ddirwy o £200 am bob un o'r ddwy drosedd.

Yn ogystal, cyhoeddodd y llys ordal dioddefwr o £160 a rhoddwyd costau erlyn o £150, cyfanswm o £710 i gyd.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.