Hosbis Dewi Sant yn cau eu safle yng Nghaergybi dros dro

Llun o Hosbis Dewi Sant
Disgrifiad o’r llun,

Cafodd yr hosbis ei hagor yn 2021 ond mae'n cau dros dro am sawl ffactor meddai'r elusen

  • Cyhoeddwyd

Bydd elusen Hosbis Dewi Sant yn cau eu hosbis yng Nghaergybi dros dro o fis Hydref 2025 ymlaen.

Mae hyn yn golygu y bydd nifer o swyddi clinigol ac anghlinigol yn y fantol yno wrth i ymgynghoriad llawn ddechrau.

Mewn datganiad dywedodd llefarydd bod "llesiant staff yn flaenoriaeth ac rydym yn darparu cymorth i'r staff yn ystod y cyfnod anodd hwn".

Dywedon nhw hefyd y bydd gwasanaethau yn eu safleoedd yn Llandudno a Bangor yn parhau ac ar gael i bawb sy'n cael gofal yng Nghaergybi ar hyn o bryd.

'Newyddion trychinebus'

Cafodd yr hosbis ei hagor ar Ddydd Gŵyl Dewi ar safle Ysbyty Penrhos Stanley yn 2021.

Dyma oedd yr hosbis gyntaf i gael ei lleoli ar Ynys Môn ac mae'n cynnwys pedwar gwely.

Fe ddywedodd yr Aelod Seneddol, Llinos Medi bod hyn yn "newyddion trychinebus i deuluoedd a staff Ynys Môn.

"Cefais brofiad personol gan weld gofal rhagorol yng Nghaergybi rai misoedd yn ôl," meddai cyn pwysleisio bod yn "rhaid gwarchod y gwasanaethau yma'n well".

Yn ôl yr elusen mae sawl ffactor yn gyfrifol am eu penderfyniad gan gynnwys "cyfuniad o gostau rhedeg cynyddol ac incwm is".

Ychwanegon nhw y bydd hyn yn eu caniatáu i "ganolbwyntio ar gryfhau ein gweithrediadau - gan helpu i gyflawni cenhadaeth yr hosbis i sicrhau bod pobl Ynys Môn, Conwy a Gwynedd yn derbyn y gofal diwedd oes y maen nhw'n ei haeddu".

Mi fydd y penderfyniad yma i gau'r cyfleuster dros dro yn cael ei adolygu ymhen 12 mis.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.

Pynciau cysylltiedig