Dedfrydu dyn o Gasnewydd am anffurfio clustiau cŵn bach

Dywedodd Moheiz Adam yn 2021 y gallai drefnu i glustiau cŵn bach gael eu tocio i roi edrychiad "trawiadol" iddyn nhw

Rhybudd: Gallai'r cynnwys isod beri gofid i rai

Mae dyn o Gasnewydd wedi cael ei ddedfrydu i bron i ddwy flynedd o garchar wedi ei ohirio, ar ôl cyfaddef iddo anffurfio clustiau cŵn bach.

Dywedodd y bridiwr cŵn Moheiz Adam wrth ohebydd cudd y BBC yn 2021 y gallai drefnu i docio clustiau cŵn i roi edrychiad "trawiadol" iddyn nhw.

Fe wnaeth swyddogion lles anifeiliaid ymateb i gwynion eraill am ei gŵn, a chanfod tystiolaeth o gŵn bach wedi'u hanffurfio a phasbortau ffug ar gyfer anifeiliaid anwes yn ei gartref.

Dywedodd y barnwr fod Adam wedi anffurfio cŵn am fod ganddyn nhw fwy o werth fel hynny, gan ganmol y BBC am helpu i ddatgelu ei droseddau.

Fe wnaeth Adam bledio'n euog i naw cyhuddiad, gan gynnwys achosi dioddefaint i anifail a meddu ar basbort ci i'w ddefnyddio ar gyfer twyll.

Clywodd y llys fod Adam wedi "rhoi elw o flaen lles yr anifeiliaid", a bod "pasbortau ffug ar gyfer cŵn" wedi'u darganfod yn ei dŷ, oedd yn awgrymu ei fod yn "allforio anifeiliaid" i Rwmania.

Dangosodd lluniau ar ffôn Adam ef gyda chŵn bach oedd wedi cael eu clustiau wedi'u torri yn ddiweddar

Fe rannodd Adam hysbysebion rheolaidd ar y cyfryngau cymdeithasol am gŵn tebyg i American Bully, gan frolio am eu maint a'u pŵer.

Nid oedd yn fridiwr cŵn trwyddedig, gan honni i'r BBC ei fod yn "fridiwr hobi" ac nad oedd torri clustiau cŵn yn gwneud unrhyw niwed iddynt.

Roedd tipyn o'r hyn yr oedd yn ei bostio ar-lein yn cynnwys yr hyn a oedd yn ymddangos fel cŵn ifanc gyda'u clustiau wedi'u torri.

Yn ôl yr RSPCA, mae'r arfer "poenus a diangen" yn cynnwys tynnu croen oddi ar bennau clustiau cŵn i'w hail-lunio.

Ymchwiliad BBC

Yn 2021, cysylltodd newyddiadurwr cudd o raglen Wales Investigates y BBC ag Adam, gan esgus bod yn gwsmer posib.

Cynigiwyd cŵn bach i'r newyddiadurwr am gymaint â £13,000, tra honnodd Adam ei bod yn "drueni" bod torri clustiau yn anghyfreithlon yn y DU.

Er gwaethaf hyn, cynigiodd yn ddiweddarach i rywun anffurfio clustiau'r ci am gost ychwanegol.

Dywedodd fod modd cuddio'r weithred anghyfreithlon rhag yr awdurdodau trwy honni bod y torri wedi'i wneud dramor, a bod y ci wedi'i fewnforio.

Doedd y newyddiadurwr ddim wedi prynu'r ci ond pan holodd tîm Wales Investigates am ei weithgareddau, honnodd Adam ei fod yn "sibrydwr cŵn".

Hysbyseb o dudalen Instagram Adam, a ddefnyddiodd i hysbysebu ei gŵn

Dywedodd Clive Jones o dîm safonau masnach Cyngor Casnewydd: "Roedd ymchwiliad y BBC o werth mawr… nododd ei fod yn gwneud gweithgareddau penodol."

Dywedodd Mr Jones fod timau lles anifeiliaid wedi ymateb yn ddiweddarach i bryderon eraill am gŵn Adam ym mis Gorffennaf 2022 a chwilio ei gartref yng Nghasnewydd.

Roedd gan dŷ teras Adam sawl ci y tu mewn gan gynnwys un ci ifanc â chlustiau byr, a saith pasbort ffug ar gyfer anifeiliaid anwes.

Un o'r cŵn a ddarganfuwyd ar eiddo Adam yng Nghasnewydd, gyda'i glustiau wedi'u torri

"[Roedd y pasbortau anifeiliaid anwes] iddo eu rhoi i ddarpar brynwyr y cŵn i ddweud bod y ci hwn wedi'i fewnforio a bod unrhyw anffurfio wedi'i wneud y tu allan i'r DU," meddai Mr Jones.

"Roedd yn rhaid iddo wneud hynny trwy ddogfennau ffug i geisio cuddio ei fodel busnes, sef iddo drefnu anffurfio'r cŵn hynny i gwsmeriaid mewn gwirionedd.

"Roedd yn gwybod beth oedd yn ei wneud. Roedd yn hapus i anffurfio cŵn er ei fudd troseddol ei hun, i wneud llawer iawn o arian. Dyna'r cyfan oedd o ddiddordeb iddo."

Dywedodd Clive Jones nad oedd "unrhyw ffordd y dylai pobl fel Adam fod yn rhan o werthu cŵn bach"

Dywedodd Vanessa Waddon o Hope Rescue ym Mhont-y-clun, Rhondda Cynon Taf, sydd wedi derbyn llawer o gŵn â chlustiau byr dros y blynyddoedd, fod yr awydd am "ddelwedd" penodol yn dal i fod yn broblem.

Er ei bod hi'n obeithiol y gallai deddfwriaeth newydd sy'n mynd trwy'r Senedd wahardd mewnforio cŵn â chlustiau byr, mae "gormod o fylchau" o hyd, meddai.

"Nid yw'r ddeddfwriaeth bridio yn ddigon llym o hyd - nid oes gennym ni ddigon o adnoddau ar gyfer gorfodi.

"Dydw i ddim yn credu y byddwn ni'n dileu'r math yna o fridio am amser hir iawn nes bod gennym ni'r ddeddfwriaeth gadarn honno a mwy o adnoddau ar waith."

Dywed Vanessa Waddon nad oes digon o adnoddau ar gyfer gorfodi cyfreithiau bridio

Gwadodd Adam wneud unrhyw beth o'i le i ddechrau, ond plediodd yn euog yn ddiweddarach i feddu ar erthygl i'w defnyddio mewn twyll - sef pasbort yr anifail anwes.

Cyfaddefodd hefyd i wyth cyhuddiad arall o dan y ddeddf lles anifeiliaid.

Cafodd Adam ei ddedfrydu i 80 wythnos o garchar wedi ei ohirio am ddwy flynedd.