Cymru yn curo Gwlad yr Iâ ac yn ennill dyrchafiad annisgwyl

Sgoriodd Cullen ddwy gôl, yn ogystal â chreu dwy

Curodd Cymru Gwlad yr Iâ o 4-1 yng Nghynghrair y Cenhedloedd nos Fawrth, gan sicrhau dyrchafiad i haen uchaf y gystadleuaeth.

Mae'r fuddugoliaeth - ynghyd â chanlyniad annisgwyl yn y gêm rhwng Montenegro a Thwrci - yn golygu fod Cymru wedi ennill eu grŵp.

Sgoriodd Liam Cullen ddwy gôl yn yr hanner cyntaf, cyn i Brennan Johnson a Harry Wilson ychwanegu gôl yr un yn yr ail hanner.

Roedd colled Twrci i Montenegro o 3-1 ar yr un noson yn golygu fod Cymru wedi cymryd safle cyntaf grŵp 4 yn yr ail haen.

Nid yw Cymru wedi colli gêm ers i Craig Bellamy ddod yn rheolwr

Fe wnaeth Bellamy bedwar newid i'r tîm a gafodd gêm gyfartal i ffwrdd yn Nhwrci ddydd Sadwrn, gyda Mark Harris yn arwain yr ymosod.

O'r funud gyntaf roedd Orri Óskarsson yn profi i fod yn llond llaw i amddiffynwyr Cymru, gyda'i gefn at y gôl.

Gwlad yr Iâ oedd y tîm ar y droed flaen am rannau helaeth o'r hanner cyntaf, a doedd arbediad campus Danny Ward ddim yn ddigon i rwystro Andri Guðjohnsen rhag sgorio ei wythfed gôl i'w wlad ar ôl saith munud.

Doedd Cymru heb ildio gôl mewn gêm gartref ers chwarae'r Ffindir fis Mawrth diwethaf.

Ond wedi cyfnod gwell i'r Cymry fe gafon nhw eu gwobrwyo, wedi i Liam Cullen benio croesiad o droed chwith Brennan Johnson i gefn y rhwyd - ei gôl ryngwladol gyntaf.

Ychydig cyn hanner amser roedd Cymru ar y blaen, gyda Cullen unwaith eto yn cosbi Gwlad yr Iâ, ar ôl i Harry Wilson ddwyn y meddiant.

Dechreuodd yr ail hanner yn arafach, ond arbedodd Danny Ward yn dda i wthio'r bêl dros y trawst wedi 51 munud.

Tyfodd Gwlad yr Iâ mewn i'r gêm gan roi Cymru o dan bwysau mawr am gyfnodau, gyda VAR yn gwirio a gwrthod cic o'r smotyn iddynt ar ôl 60 munud.

Ond pum munud yn ddiweddarach dyblodd Cymru eu mantais i wneud y sgôr yn 3-1, pan saethodd Brennan Johnson i gornel isaf y rhwyd, ar ôl i Cullen ei fwydo trwy fwlch yn yr amddiffyn.

Profodd i fod yn noson dda iawn i Liam Cullen, a dim ond gwella wnaeth pethau wedi 79 munud, pan arweiniodd ei bas i Harry Wilson sgorio o du allan y cwrt cosbi.

Hon oedd gêm olaf Cymru yn 2024.