Effaith adeiladu llwybr beicio yn Sir Gâr yn 'annerbyniol'

Mae Richard a Charlie Moore yn dweud bod y llwybr yn wahanol i'r cynlluniau gwreiddiol

Mae rhai tirfeddianwyr yn Nyffryn Tywi yn flin am effaith y gwaith o greu llwybr beicio rhwng Abergwili a Llandeilo yn Sir Gaerfyrddin.

Mae Cyngor Sir Caerfyrddin wedi cael £16.7m gan Lywodraeth y Deyrnas Uniedig i gwblhau'r cynllun, sydd yn creu llwybr seiclo a cherdded 20km o hyd trwy ganol y dyffryn.

Dywedodd un tirfeddiannwr wrth BBC Cymru bod y llwybr yn fwy llydan na'r disgwyl mewn mannau ac yn bellach o'r cloddiau, fydd yn creu trafferthion o ran cynnal a chadw.

Yn ôl Cyngor Sir Caerfyrddin mae'r llwybr wedi cadw at y "cynlluniau a'r manylebau y cytunwyd arnynt".

'Bydd e'n wast a'n tyfu trash'

Cafodd yr awdurdod bwerau i feddiannu rhannau o dir ar hyd y llwybr trwy orchmynion prynu tir gorfodol yn dilyn ymchwiliad cyhoeddus.

Mae'r cyngor yn dweud y gallai'r llwybr seiclo newydd rhwng Abergwili a Llandeilo gyfrannu hyd at £4.4m at yr economi leol bob blwyddyn.

Mae Richard Lewis yn teimlo na fydd unrhyw fudd i dirfeddianwyr sydd wedi colli eu tir trwy orchmynion prynu gorfodol

Mae Richard Lewis yn ffermio yn Abergwili ac yn cwyno am yr effaith ar ei fferm.

"So ni moyn e 'ma. Maen nhw'n gadael gormod o ddaear ochr draw i'r cycle path. Bydd e'n wast a bydd e'n tyfu trash," meddai.

"Bydd rubbish yn cael ei daflu mewn iddo fe a pwy sydd yn mynd i maintaino fe? Sai'n credu bod y council yn mynd i maintaino fe. "

Dydy Mr Lewis ddim yn teimlo y bydd unrhyw fudd i dirfeddianwyr sydd wedi colli eu tir trwy orchmynion prynu gorfodol.

"Falle bydd e'n dod ag arian i mewn i'r ardal, ond bydd e ddim yn dod ag arian i ni.

"Mae'n mynd â lot o ddaear wrthon ni, a ni moyn e i gynhyrchu bwyd."

Mae'n dweud bod y llwybr yn fwy llydan, mewn mannau, na'r tri medr yr oedd yn ei ddisgwyl yn ôl y cynlluniau.

"Ar y plans roedd e'n dweud mai three metres oedd e. Nawr maen nhw'n mynd â nine metres."

'Nifer o dirfeddianwyr yn flin'

Un arall sydd yn pryderu ydy cymydog Mr Lewis, Charlie Moore, sy'n dweud bod y llwybr yn wahanol i'r cynlluniau gwreiddiol.

"Mae'n hollol wahanol. Dwi'n gwybod bod pethau yn newid, ond dyw pethau ddim yn newid mor fawr â hyn.

"Mae'n annerbyniol os ydych chi yn edrych ar beth sydd wedi mynd ymlaen. Mae cwestiynau gan bawb."

Mae'n dweud bod nifer o dirfeddianwyr yr ardal yn flin.

"Dwi ddim wedi siarad gydag un person sydd yn hapus gyda beth sydd yn mynd ymlaen," meddai.

Pont newydd sydd wedi cael ei adeiladu ar gyfer y llwybr beicio

Mae ei dad, Robert, hefyd yn dweud bod y llwybr yn wahanol i'r hyn a amlinellwyd yn wreiddiol.

"Fe roddwyd cynlluniau i ni, yn esbonio beth oedd yn mynd i ddigwydd, ond maen nhw yn wahanol iawn i beth sydd yn cael ei wneud.

"Mae yna fwlch o dair metr rhwng y llwybr a'r ffin.

"Mae'n ddigon gwael fod fy nhir yn cael ei dorri yn hanner. Mae mwy o dir wedi cael ei ddefnyddio yn ddireswm."

Mae ffermwyr yn poeni bod gormod o dir yn cael ei ddefnyddio i greu'r llwybr beicio newydd

Dywedodd y Cynghorydd Edward Thomas, aelod cabinet Cyngor Sir Caerfyrddin dros drafnidiaeth, gwastraff a seilwaith, bod yr awdurdod yn "ymwybodol o'r pryderon a godwyd gan Richard Lewis".

"Rydym yn pwysleisio unwaith eto fod y prosiect wedi'i gyflawni gan gadw at y cynlluniau a'r manylebau y cytunwyd arnynt."

Ychwanegodd eu bod wedi trafod yn rheolaidd ag asiantau a benodwyd gan Mr Lewis ac wedi cyfarfod gydag ef ar y safle i drafod ei bryderon.

"Mae'n bwysig pwysleisio bod y tir, sydd wedi'i gaffael a'i roi'n gyfreithlon, a'r trywydd y cytunwyd arno ar gyfer y llwybr yn gyson â maint y safle presennol ac ôl troed y llwybr.

"Mynegwyd hyn ar y cychwyn i'r tirfeddianwyr yn ystod y broses gynllunio a chaffael tir.

"Cafodd y tir ar gyfer y llwybr beicio ei gaffael trwy broses gorchymyn prynu gorfodol, a oedd yn cynnwys ystyriaeth ac ymgynghori gofalus.

"Rydym yn deall pwysigrwydd lleihau'r effaith ar dirfeddianwyr lleol ac rydym yn parhau i fod yn ymrwymedig i fynd i'r afael ag unrhyw faterion sy'n codi."