Unigrwydd, TikTok, a chodi miloedd o bunnoedd i gyd dan chwerthin

Dechreuodd taith Katie Tradie fel dylanwadydd TikTok ac Instagram mewn man annisgwyl.

Yn ôl yn 2020 ynghanol pandemig byd-eang fe benderfynodd hi a'i theulu ddod oddi ar y cyfryngau cymdeithasol.

Roedd eu defnyddio nhw'n achosi pryder iddi gan fod cymaint o gamwybodaeth a datganiadau di-sail.

Ond ychydig fisoedd yn ddiweddarach - a'i gŵr wedi dychwelyd i'w waith ar ôl cyfnod hir o ffyrlo, a hithau adref ar ei phen ei hun gyda babi newydd - fe ddechreuodd deimlo'n unig.

Katie a'i gŵr, Adam

Dywedodd y fam o Langennech wrth Cymru Fyw: "Ar ôl hynny, ro'n i'n teimlo'n isel, ac o'n i jest eisiau gwneud rhywbeth i fwynhau fy hun, ac felly 'nes i ddechrau gwneud fideos doniol."

Erbyn hyn mae ganddi nifer o gyfrifon gyda channoedd o filoedd o ddilynwyr.

"Dwi wastad wedi bod yn greadigol ac wedi gwneud fideos, ac yn cyfathrebu efo fy ffrindiau drwy wneud fideos. Felly ro'n i wedi ffendio rhywbeth oedd yn fendith am fy mod i'n siarad gyda phobl eraill."

Eglurodd Katie bod ei fideos cychwynnol amdani hi'n temlo ychydig ar goll fel mam, a rhannu ei phrofiadau fel "ychydig o hwyl".

Ond yn fuan roedd hi'n rhan o "gymuned anhygoel wnaeth helpu gyda iechyd meddwl".

Tair blynedd yn ddiweddarach, ar ddechrau 2024, fe roddodd y gorau i'w swydd mewn siop ffonau symudol a dechrau gweithio llawn amser ar gynnwys, a chreu partneriaethau rhwng gwahanol gyfrifon ar-lein.

Gwaith elusennol

Yn sgil ei phoblogrwydd ar-lein mae Katie yn gallu gwneud arian o'i chynnwys. Mae gan un o'i chyfrifon TikTok, the_tradie_wife bron i 450,000 o ddilynwyr.

Yn y misoedd cyn Nadolig 2024, fe benderfynodd Katie roi'r arian y byddai hi'n ei wneud o fis o gynnwys i elusen. Cafodd Katie ymateb gwych i'r syniad yma gan ei dilynwyr.

Defnyddiodd yr arian i wneud beth mae hi'n ei alw yn "hauls".

Llond fan o roddion!

"Nes i feddwl yn galed am at ba elusen i gyfrannu. Meddyliais, wna i ei roi i elusen sy'n gweithio gyda mamau. Yna nes i feddwl, wna i gyfrannu i'r lloches menywod lleol.

"Dydyn nhw ddim yn gallu hysbysebu am roddion oherwydd natur y lloches, ac felly mae pobl yn gallu anghofio amdanyn nhw.

"Felly mi ddefnyddiais yr arian i brynu pethau oedd eu hangen ar fy lloches menywod lleol."

Ar ôl llwyddiant y cyntaf, penderfynodd wneud un arall gyda gwahanol siopau yn cynnig gostyngiadau hyd at 50% iddi er mwyn gwneud yr arian fynd yn bellach.

Mae wedi rhoi gwerth miloedd o bunnoedd o nwyddau i elusennau dros y misoedd diwethaf, ac ar hyn o bryd mae'n paratoi i fynd i wario'r cyfanswm diweddaraf o £1,300 ar ran ei banc bwyd lleol.

Katie gyda staff un o siopau'r stryd fawr yn gafael yn y dderbyneb am yr holl bethau oedd yn mynd i elusen y Lloches Menywod

Bod yn Gymreig ar-lein

Bob hyn a hyn, fe fydd Katie yn gwyro oddi wrth y fideos dydd-i-ddydd am ei bywyd fel mam a'i hymdrechion elusennol a chreu fideos dychanol am rai o'r ystrydebau am genedlaetholwyr Cymreig neu bethau eraill y caiff Cymry eu gwawdio amdanynt.

"Dwi wedi sylwi, fel person Cymreig ar-lein, mae pobl yn cymryd yn ganiataol dy fod di'n dwp oherwydd dy acen di.

"A hefyd, mae gan lawer o bobl gamddealltwriaeth am Gymru. Mae rhai pobl wir yn meddwl ein bod ni'n byw'n bellenig heb unrhyw dechnoleg."

Felly yn ei fideos dychanol, mae Katie yn cymryd y pethau hyn ac yn mynd â nhw i'r eithaf gyda'i chymeriad "Kaddydd – the only English-speaking person in the Republic of Wales" ac yn "addysgu" pobl am ryfeddodau Cymru fel yr anifail bychan Araf, sy'n cael ei warchod gan rybuddion wedi'u paentio ar y lonydd, neu draddodiadau fel dathlu Dry Dai Day, y diwrnod cenedlaethol i nodi'r unig ddiwrnod sych gafodd Cymru un flwyddyn.

Bwrdd Twristiaeth dychmygol Katie, Pop by Wales, ac un o'i hamyw jôcs am yr anifail dychmygol "Araf"

Ond dydy ymateb pawb ddim wedi bod yn ffafriol. Meddai Katie, er mai jôc ydy'r cynnwys yn amlwg, mae'n anodd dod o hyd i'r cydbwysedd.

"Mae rhai pobl Gymraeg wedi dweud wrtha i 'ti jest yn gwneud i ni edrych yn wirion.' Ond dwi'n credu – mae pobl yn dweud hyn amdanon ni'n barod – y cwbl dwi'n ei wneud yw chwarae efo'r ystrydeb yna."

Ehangu a thyfu cynulleidfa

Gyda'i gallu comedi, mae Katie nawr yn troi ei llaw at gynnwys hirach na chynnwys ffurf-byr y cyfryngau cymdeithasol yn ffurf rhaglen Taff TV ar gyfer YouTube.

Ers rhai misoedd mae Katie a'i chyd-Gymro Jenkin Edwards wedi bod yn ffilmio cyfres y mae hi'n ei disgrifio fel "Gavin & Stacey meets Top Gear."

"Dwi'n credu fy mod i a Jenkin yn bersonoliaethau mawr, a hanner yr amser dydyn ni ddim yn cytuno. Felly mae 'na lawer o gecru, a dwi'n meddwl y bydd pobl yn mwynhau hynny!"

Gyda Jenkin Edwards yn recordio Taff TV

"Rydyn ni wrthi'n ffilmio mewn amryw leoliadau nawr. Felly mae'n rhyw fath o ddogfen-gomedi.

"Dwi a Jenkin yn mynd ar brofiad gwaith, ac yn cystadlu yn erbyn ein gilydd ar ddiwedd pob pennod i weld pwy sydd wedi gwneud orau.

"Rydyn ni wedi bod i bob mathau o lefydd, ond dydyn ni ddim yn gwybod i le ymlaen llaw. Un oedd rhaid i ni ei wneud oedd cynnal parti tywysogesau, lle roedd rhaid i'r ddau ohonon ni wisgo fyny fel tywysoges a diddannu llwyth o blant!

"Rydyn ni'n llenwi'r CVs 'na, achos mi allai'r cyfryngau cymdeithasol ddod i ben fory!"