Am yn 5 oed: Uchafbwyntiau 'cartref digidol diwylliant Cymru'

Mae gwasanaeth Am yn dathlu pen-blwydd yn bump oed eleni, ac yn nodi'r garreg filltir trwy lansio gwefan newydd a mwy.

Uchelgais y llwyfan yw bod yn 'gartref digidol i ddiwylliant Cymru'.

Yn ôl Am mae gan dros 480 o sefydliadau creadigol bresenoldeb ar y platfform, sy'n ofod agored i gyhoeddi a darganfod cerddoriaeth, celf, ffilmiau a straeon – a'r bobl y tu ôl iddynt.

Yn siarad ar raglen Dros Ginio yr wythnos hon, fe wnaeth Alun Llwyd, prif weithredwr Am, egluro mwy am y gwasanaeth a'u gobeithion am y dyfodol.

"Mae'n blatfform i bawb ei ddefnyddio. Mae'n agored, mae'n ddemocrataidd ac yn cael ei ariannu gan Lywodraeth Cymru.

"Rydan ni'n ei weld fel gwasanaeth nid yn unig i hyrwyddo'r cyfryngau ond hefyd i sicrhau fod lleisiau ar yr ymylon a chreadigrwydd cymunedau yn cael eu hadlewyrchu.

"Mae pobl angen y BBC ac S4C, ond mae pobl hefyd angen gofod fel Am sy'n ofod cyfranogol ble mae cyfle i bobl fynegi lleisiau a chreadigrwydd yn hwylus."

Alun Llwyd, Prif Weithredwr Am

Fel rhan o ddathliadau yr wythnos hon, mae partneriaethau creadigol newydd hefyd wedi eu cyhoeddi. Meddai Alun:

"Rydan ni'n dathlu'r pum mlynedd gyda gwefan newydd, gŵyl ffilmiau newydd a phartneriaethau newydd.

"Fe wnaethon ni roi galwad agored allan am syniadau i'r ŵyl ffilmiau gyda chefnogaeth Cyngor y Celfyddydau. Fe gafon ni dros 100 o geisiadau i'r gronfa – gan enwau oedd ddim yn enwau cyfarwydd ym myd ffilm Cymru.

"Mae'n dangos y diddordeb sydd yna am fynegiant cymunedol, a'r angen am blatfform fel Am i gynrychioli a darlledu y mynegiant cymunedol yna."

Felly beth sydd i'w ddarganfod ar Am?

I nodi'r pen-blwydd fe ofynnodd Cymru Fyw i Alun ddewis rhai o uchafbwyntiau diweddar y llwyfan.

1. Pwy Ydw I Heddiw? – Ffion Pritchard

I gyd-fynd â lansiad ein gwefan newydd, rydym wedi darlledu pedair ffilm fel rhan o don gyntaf gwyl ffilmiau ddigidol AmCam.

Ymysg y rhain mae ffilm iaith Gymraeg hyfryd gan y gwneuthurwr ffilm Ffion Pritchard, sydd yn trafod prosiect creadigol sy'n anelu i godi hyder merched ar ffurf sesiynau creadigol ym Mangor.

2. Yr Hen Iaith – Cyfres 3

Podlediad gweledol hwyliog am hanes llenyddiaeth Gymraeg, gyda'r Americanwr Jerry Hunter yn dysgu Richard Wyn Jones am drysorau'i iaith ei hun.

Mae wedi cyrraedd dros 60 o benodau erbyn hyn – a gan mai William Williams, Pantycelyn yw pwnc y bennod ddiweddaraf, nid yw'n debygol o ddod i ben yn fuan!

3. Adroddiad o Chwarel Ithfaen ym Mhenmaenmawr a Phroblemau Llwch i Dai Cyfagos

Darn hynod ddifyr o realaeth ffuglennol gan Kayley Roberts sy'n ymchwilio i themâu a ysbrydolwyd gan ffilm hanesyddol o gymunedau chwarel o Archif Darlledu Cymru.

Comisiynwyd y gwaith gan y mudiad Newyddiaduraeth Gynhwysol Cymru.

4. Artist y Mis: Evrah Rose

Ein partneriaeth gyda Chelfyddydau Anabledd Cymru yw un o uchafbwyntiau pum mlynedd cyntaf Am.

Rydym yn falch iawn o rannu gwaith arbennig ei haelodau drwy'r gyfres Artist y Mis. Y diweddaraf o'r rheiny yw'r bardd, awdur a cherddor rap, Evrah Rose.

5. Aleighcia Scott – Dod o'r Galon

Mae gan PYST gronfa gyda S4C sydd yn ariannu fideos cerddoriaeth cyntaf artistiaid o Gymru.

Yn ddiweddar, roedden yn falch o ariannu fideo cyntaf Aleighcia Scott yn yr iaith Gymraeg.

Dilynwch Cymru Fyw ar Facebook, X, Instagram, neu TikTok.

Anfonwch unrhyw syniadau am straeon i [e-mail], neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.